ރައީސް މުއިއްޒުގެ ކެބިނެޓްގައި ހިމެނިވަޑައިގެންނަވާ ބައެއް ވަޒީރުން ފޯނު ނުނަންގަވާތީ ދިއްދޫ ދާއިރާގެ މެމްބަރުން އަބުދުއްލަތީފް މުހައްމަދު މިއަދު ނުރުހުން ފާޅު ކުރައްވައިފިއެވެ.
ރައްޔިތުންނަށް ޚިދުމަތް ދިނުމުގައި ބައެއް ވަޒީރު ބޭފުޅުން އިޚުލާސްތެރި ނޫން ކަމަށާއި ރައީސް ޑރ. މުހައްމަދު މުއިއްޒާ ގާތްވުމަކީ އެ ބޭފުޅުންނަށް މަގާމުގައި ދެމިތިއްބެވޭނެ ސަބަބެއް ނޫން ކަމަށް ވިދާޅުވެ، ދިއްދޫ ދާއިރާގެ، ޕީއެންސީ މެންބަރު އަބްދުއްލަތީފް މުހައްމަދު (ލަތީބެ) ވާހަކަ ދެއްކެވީ ރައްޔިތުންގެ މަޖިލީހުގެ ދައުރުން ބޭރުން ބާއްވާ ދެވަނަ ޖަލްސާގައި މިއަދު ވާހަކަދައްކަވަމުންނެވެ.
ބައެއް ވަޒީރުން ފޯނު ނުނަންގަވާ މައްސަލައިގައި އޭނާ ވަނީ ވަރަށް ބޮޑަށް ނުރުހުން ފާޅުކުރައްވައިފައެވެ. ރައްޔިތުންގެ މަޖިލީހުގެ ދައުރުން ބޭރުން ބާއްވާ ދެވަނަ ޖަލްސާގައި މިއަދު ވާހަކަދައްކަވަމުން މެންބަރު ލަތީފް ވިދާޅުވީ، ދިވެހި ރައްޔިތުންނަށް ބޭނުންވާ ވަރަށް ގިނަ ކަންކަމުގައި މަޖިލީސް މެންބަރުން ވަޒީރުންނަށް ފޯނުކުރަންޖެހޭ ކަމަށެވެ. އެއީ، އެކި މަސައްކަތްތައް އަވަސްކޮށްދިނުމާއި ކަންކަން ފަހިކޮށްދޭން އެދި ކަމަށް އޭނާ ވިދާޅުވިއެވެ.
މި ވަޒީރުން ފޯނު ނުނަންގަވާ މައްސަލައަކީ ބޮޑު މައްސަލައެއް. އަދި، ކަންތައްތައް ނުކޮށްދޭ މައްސަލައަކީ ވެސް ވަރަށް ބޮޑު މައްސަލައެއް.. މިއިން ބައެއް ވަޒީރުން ޚުދު ރައީސުލްޖުމްހޫރިއްޔާއަށް ވެސް އިޚުލާސްތެރިކަމާ އެކު މަސައްކަތްކުރާކަން، ނުވަތަ އިޚުލާސްތެރިކަމާ އެކު މަސައްކަތްކޮށްދޭކަން އަޅުގަނޑުމެންނަށް ކަށަވަރެއް ނޫން.
ބައެއް ވަޒީރުންނަށް ވަރަށް ބޮޑަށް ނުރުހުން ފާޅުކުރައްވާ ލަތީފް ވިދާޅުވިއެވެ.
ލަތީފް ވިދާޅުވީ މި ވަޒީރުން ފޯނު ނުނަންގަވާ މައްސަލައަކީ ބޮޑު މައްސަލައެއް ކަމަށާއި، ކަންތައްތައް ނުކޮށްދޭ މައްސަލައަކީ ވެސް ވަރަށް ބޮޑު މައްސަލައެއް ކަމަށެވެ. އަދި މިއިން ބައެއް ވަޒީރުން ޚުދު ރައީސުލްޖުމްހޫރިއްޔާއަށް ވެސް އިޚުލާސްތެރިކަމާ އެކު މަސައްކަތްކުރާކަން، ނުވަތަ އިޚުލާސްތެރިކަމާ އެކު މަސައްކަތްކޮށްދޭކަން ކަށަވަރެއް ނޫން ކަމަށް އޭނާ ވިދާޅުވިއެވެ. ބައެއް ވަޒީރު ބޭފުޅުން ރައީސް މުއިއްޒާ ގާތްވުމުން، އެ ބޭފުޅުން މަގާމުން ދުރުނުކުރެވޭނެ ކަމަށް ހީކުރާ ކަމަށާއި އެކަމަކު، އެއީ ހަގީގަތެއް ނޫން ކަމަށް އޭނާ ވިދާޅުވިއެވެ.
ވަޒީރުންނަށް ހީވާ ކަހަލަ، ރައީސުލްޖުމްހޫރިއްޔާއާ މާ ގާތްވީމާ އެ ބޭފުޅުންނަށް މަގާމުގައި ތެމިތިބެވޭނޭ ބައިވަރު ދުވަހު… 18 ވަނަ މަޖިލީހުގައި ވެސް އަޅުގަނޑުމެން ހުންނާނީ އަޅުގަނޑުމެންގެ ވަޒީރުން މަގާމުން ވަކިކޮށްފައި.. އެކަން މިހާރު ވެސް ހަނދާންކޮށްދެން ވަޒީރުންނަށް. އަޅުގަނޑުމެންނަށް އިޚުލާސްތެރިކަމާ އެކު، މި ސަރުކާރަށް، ރައްޔިތުންނަށް އިޚުލާސްތެރިކަމާ އެކު މަސައްކަތް ނުކޮށްދޭ ނަމަ، ވަޒީރުން އެ މަގާމުގައި ދެމިތިބެވޭނެ ކަމަށް ހީކޮށްގެން ނުވާނެ.
ލަތީފް ވިދާޅުވިއެވެ.
މެންބަރު ލަތީފް ވިދާޅުވީ، ބައެއް މެންބަރުން އުޅުއްވަނީ ރައްޔިތުންނަށް ފިލައިގެން ކަމަށެވެ. ސަރުކާރާއި ރައްޔިތުންނާ ގުޅުވަން ތިބޭ ބަޔަކީ މަޖިލީހުގެ މެންބަރުންކަން ފާހަގަކުރައްވައި ލަތީފް ވިދާޅުވީ، އެ ގުޅުން ކަނޑާލައިގެން ނުކުންނަ ނަތީޖާ ރަނގަޅުނުވާނެ ކަމަށެވެ. ވަޒީރުން ފޯނު ނުނަންގަވާ ވާހަކަ ވަރަށް ގިނަ ރައްޔިތުން ދައްކާ ކަމަށް އޭނާ ވިދާޅުވިއެވެ.
އެނގިފައިވާ ގޮތުގައި ބައެއް ވަޒީރުންނާ ބައްދަލުނުވެ، ފޯނުން ވެސް ވާހަކަ ނުދެކެވޭ މައްސަލައިގައި ބައެއް މެންބަރުން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ. މި ހިނގާ ވިހިވަނަ މަޖިލީހުގައި ސަރުކާރު ހިންގާ ޕީއެންސީއަށް ނިސްބަތްވާ 75 މެންބަރުން ތިއްބަވައެވެ.
މަޖިލިހުގައި އޮތް ސުޕަ މެޖޯރިޓީން ވަނީ، މެންބަރުން ޕާޓީން ވަކިކުރި ނަމަވެސް އަދި އަމިއްލައަށް ޕާޓީން ވަކިވިޔަސް މެންބަރުކަން ގެއްލޭ ގޮތަށް ގާނޫނުއަސާސީއަށް އިސްލާހު ގެނެސްފައެވެ.
