މިދިޔަ ޑިސެމްބަރު މަހު ވަޒީރުންގެ މަޖިލީހަށް ގެނައި ބަދަލާއެކު ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީން ހަތަރު ވަޒީރުންނަށް ރުހުން ދިނުމަށް ފާސްކޮށްފިއެވެ.
މި ވަޒީރުންގެ ނަންތައް މިދިޔަ ބުރާސްފަތި ދުވަހު ބޭއްވި ޖަލްސާއިން ކޮމިޓީއަށް ފޮނުވުމަށްފަހު، މިއަދު ބޭއްވި ކޮމިޓީ ބައްދަލުވުމުގައި ހުރިހާ މެމްބަރުންގެ އިއްތިފާގުން ވަނީ މި ހަތަރު ވަޒީރުންނަށް ރުހުން ދިނުމަށް ފާސްކޮށްފައެވެ.
ކޮމިޓީން ރުހުން ދީފައިވާ ވަޒީރުންގެ ތެރޭގައި މިނިސްޓަރ އޮފް ފިނޭންސް އެންޑް ޕްލޭނިންގގެ މަޤާމަށް ތ. ބުރުނި، ނިވައިދޮށުގެ މޫސާ ޒަމީރު، މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ މަޤާމަށް މއ. ވެނީލާގެ ޑޮކްޓަރ ޢަލީ ޙައިދަރު އަޙްމަދު، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަޤާމަށް މއ. މާރާދަގެ ޑޮކްޓަރ މަރްޔަމް މާރިޔާ، އަދި މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ މަޤާމަށް ގދ. ފިޔޯރީ، ގުލްބަކާގެ، ޑޮކްޓަރ ޢަބްދުﷲ މުއްޠަލިބް ހިމެނެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެންމެފަހުން ކެބިނެޓަށް ބަދަލު ގެންނަވައި ވަޒީރުން އައްޔަނުކުރެއްވީ މިދިޔަ ޑިސެމްބަރުމަހުގެ ތެރޭގައެވެ. މި ވަޒީރުންނަށް ރައްޔިތުންގެ މަޖިލީހުގެ ތަޅުމުން ރުހުން ދެވޭނީ ކޮމިޓީގެ ރިޕޯޓް ތަޅުމަށް ހުށަހެޅި، މެންބަރުންގެ މެދުގައި ބަހުސްކުރުމަށްފަހުގައެވެ. ފާހަގަކޮށްލެވޭ ކަމަކީ މިއީ މިހާރުވެސް މަޖިލީހުގެ ރުހުން ލިބިގެން ވަޒީރުންގެ ގޮތުގައި މަސްއޫލިއްޔަތު އަދާކުރައްވަމުން ގެންދަވާ ބޭފުޅުންނެވެ.
