ހައި ކޯޓުގެ ކުރީގެ ފަނޑިޔާރު ޝުއައިބު ހުސައިން ޒަކަރިއްޔާ މިއަދު އަވަހާރަވުމާ ގުޅިގެން ކޯޓުތަކުގެ ދިދަތައް ބައިދަނޑިއަށް ތިރިކުރަން ނިންމައިފި އެވެ.
އެނގިފައިވާ ގޮތުގައި ޝުއައިބް އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ދަނިކޮށް މާލޭގައި، އުމުރުން 55 އަހަރުގައެވެ. އޭނާގެ ކަށުނަމާދު އޮންނާނީ މިރޭ 11 ޖަހާއިރު އާސަހަރާ މިސްކިތުގައެވެ.
ސުޕްރީމް ކޯޓުން ބުނެފައިވާ ގޮތުގައި އުއްތަމަ ފަނޑިޔާރު އަހްމަދު މުއުތަސިމް އަދުނާން ވަނީ މިއަދު އިރުއޮއްސި 6 އިން ފެށިގެން މާދަމާގެ އިރުއޮއްސި 6 ޖެހުމާ ހަމައަށް ކޯޓުތަކުގެ ދިދަ ބައިދަނޑިއަށް ތިރިކުރުމަށް ނިންމަވާފައެވެ.
ޝުއައިބުގެ މަސައްކަތުގެ ދާއިރާއަށް ބަލާއިރު، 2011 މާޗު 26 އިން 2022 ނޮވެމްބަރު 22 އާ ހަމައަށް 11 އަހަރު ވަންދެން ހައިކޯޓުގެ ފަނޑިޔާރުކަން ކުރައްވާފައިވެއެވެ. މީގެ އިތުރުން ޖަސްޓިސް މިނިސްޓްރީގެ ލީގަލް އޮފިސަރުކަމާއި، ހާއްސަ ގާޒީކަމާއި، ފެމެލީ ކޯޓުގެ ގާޒީކަމާއި، މަދަނީ ކޯޓާއި ކުޑަކުދިންނާ ބެހޭ ކޯޓުގެ އިސް ގާޒީކަން ވެސް ކުރައްވާފައިވެއެވެ.
ތައުލީމީ ގޮތުން ޝުއައިބަކީ ގަތަރު ޔުނިވާސިޓީން 1997 ވަނަ އަހަރު ގާނޫނާއި ޝަރީއަތުގެ ރޮނގުން ފުރަތަމަ ޑިގްރީ ހާސިލްކުރައްވާފައިވާ ބޭފުޅެކެވެ. އަދި 2006 ވަނަ އަހަރު މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން މާސްޓާސް އޮފް ކޮމްޕަރޭޓިވް ލޯ ހާސިލްކުރައްވާފައިވެއެވެ.
