މާލޭގައި ކުރިއަށްގެންދިޔަ ޚާއްސަ އޮޕަރޭޝަނެއްގައި މަސްތުވާތަކެއްޗާއި ބަނގުރަލާއެކު ހައްޔަރުކުރެވުނު ބަންގްލަދޭޝް ރައްޔިތެއް ޑީޕޯޓްކުރުމަށްޓަކައި މޯލްޑިވްސް އިމިގްރޭޝަނާ ހަވާލުކޮށްފިއެވެ.
ފުލުހުން ބުނާގޮތުގައި އިމިގްރޭޝަނާ ހަވާލުކޮށްފައިވާ މީހާއަކީ 31 އަހަރުގެ މުޙައްމަދު އާރިފް މިއާއެވެ. މިއަހަރުގެ ޖެނުއަރީ 17 ވަނަ ދުވަހު، އޭނާއާ ގުޅުން ހުރިކަމަށް ބެލެވޭ ތަނަކުން 1.05 ގްރާމްގެ މަސްތުވާތަކެތި ކަމަށް ބެލެވޭ އެއްޗެއް ހުރި ރަބަރު ޕެކެޓަކާއި 92 ފުޅި ބަނގުރާ ފެނުނެވެ.
މި އޮޕަރޭޝަނަކީ ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެކެވެ. މިއީ ގަވާއިދާ ޚިލާފަށް ބަނގުރާ އަދި މަސްތުވާތަކެތި ބޭނުންކޮށް، ގެންގުޅެ އަދި ވިޔަފާރިކުރާކަމުގެ މަޢުލޫމާތު ކައުންޓަރ ނާކޮޓިކްސް އިންޓެލިޖެންސަށް ލިބުމާ ގުޅިގެން ކުރިއަށް ގެންދިޔަ އޮޕަރޭޝަނެކެވެ. ފުލުހުން މި މައްސަލައިގެ ތަޙުޤީޤު މިހާރުވެސް ކުރިއަށް ގެންދެއެވެ.
