މާލޭ ސިޓީ ޕޮލިހުގެ ތަފާސްހިސާބުތަކުން ދައްކާގޮތުގައި މިއަހަރު މިހާތަނަށް އެންމެ ގިނައިން ހުށަހެޅިފައިވަނީ ވައްކަމާއި އެކްސިޑެންޓުގެ މައްސަލަތައް ކަމަށް ދައްކައިފިއެވެ. ތަފާސްހިސާބުތަކުން ދައްކާ ގޮތުގައި ވައްކަމުގެ 73 މައްސަލައާއެކު، އެކްސިޑެންޓުގެ 53 މައްސަލަ މިހާތަނަށް ހުށަހެޅިފައިވެއެވެ.
މާލެއާއި ހުޅުމާލޭގައި ނުރައްކާތެރި އެކްސިޑެންޓްތައް އިތުރުވެފައިވާތީ، މިކަމުގައި ފުލުހުންގެ ފަރާތުން އަޅަމުންދާ ފިޔަވަޅުތަކުގެ ތެރޭގައި މަގުމަތީގައި ހަރަކާތްތެރިވާ ފުލުހުންގެ އަދަދު އިތުރުކުރުން ހިމެނެއެވެ. އަދި ބްރިޖުމަތީގައި ހިނގާ އެކްސިޑެންޓްތައް މަދުކުރުމަށްޓަކައި ސައިކަލު ބޭނުންކޮށްގެން ބްރިޖް ޕެޓްރޯލްކުރަން ވެސް ފަށާފައިވާ ކަމަށް ފުލުހުން މަޢުލޫމާތު ދެއެވެ.
މާލޭގައި މިއަހަރު މިހާތަނަށް ހުށަހެޅިފައިވާ އެހެނިހެން މައްސަލަތަކުގެ ތެރޭގައި މަސްތުވާތަކެތީގެ 27 މައްސަލައާއި، ތަކެއްޗަށް ގެއްލުން ދިނުމުގެ 26 މައްސަލަ ހިމެނެއެވެ. މީގެއިތުރުން ހިޔާނާތުގެ 12 މައްސަލައާއި ފޭރުމުގެ 9 މައްސަލަ ވެސް ހުށަހެޅިފައިވެއެވެ.
އަދި ފާއިތުވި އަހަރުގެ ތަފާސްހިސާބުތަކަށް ބަލާއިރު، މާލޭގައި ޖުމުލަ 5،242 މައްސަލަ ހުށަހެޅުނެވެ. މީގެ ތެރެއިން އެންމެ ގިނައީ ވައްކަމުގެ މައްސަލަތައް ކަމަށްވާއިރު، އޭގެ އަދަދަކީ 2،290 އެވެ. ދެން އެންމެ ގިނައީ އެކްސިޑެންޓުގެ މައްސަލަތައް ކަމަށްވާއިރު، އޭގެ އަދަދަކީ 2،025 އެވެ.
