ހދ. ކުރިނބީން އަނެއްކާވެސް އާސާރީ ތަކެތި ފެނިއްޖެއެވެ. މި ފަހަރު ފެނިފައިވަނީ އެ ރަށުގެ ދެކުނު ފަރާތު އަރިމަތީގައި ވަޅުލެވިފައިވާ ބޮޑު ރުނބާއަކާއި އެ ރުނބާގެ ތެރޭގައި ހުރި އާސާރީ ތަކެއްޗެވެ. މި ތަކެތި ފެނިފައިވަނީ ކުންދޭމާއި ކަނޑޫފަލާ ދެމެދު ސަރަހައްދުންނެވެ.
ކުރިނބީ ކައުންސިލްގެ އެގްޒެކެޓިވް ޑިރެކްޓަރު އަކުރަމް އަލީ ބައެއް މީޑިއާތަކަށް މައުލޫމާތު ދެއްވިގޮތުގައި މި ރުނބާ ފެނިފައިވަނީ އެ ރަށު ކަށިމާވިލާގޭ އަހުމަދު ރިޔާޒަށެވެ. ރުނބާގެ ބަރުދަން ބޮޑުކަމުން އެކަނި ނުނެގިގެން އިތުރު ދެތިން މީހަކާއެކު އެއްގަމަށް އަރުވާފައިވާ ކަމަށް އަކުރަމް ވިދާޅުވިއެވެ.
އަކުރަމް ވިދާޅުވިގޮތުގައި ރުނބާގެ ތެރެއިން ފެނިފައިވަނީ އެވޭލާ ޒަމާނުގެ ބަދިގެތަކުގައި ކެއްކުމަށް ބޭނުންކުރި ސާމާނެވެ. އޭގެ ތެރޭގައި ތަށްޓާއި، ޖޯޑާއި، ޖަގު ފަދަ މުށިން ހަދާފައިވާ ތަކެތި ހިމެނެއެވެ. މި ތަކެއްޗަކީ 380 އަހަރާއި 400 އަހަރާ ދެމެދުގެ ޒަމާނުގައި ބޭނުންކުރި ތަކެތި ކަމަށް ލަފާކުރެވޭ ކަމަށް އަކުރަމް ވިދާޅުވިއެވެ. މި ލަފާކުރެއްވުމަކީ ގޫގުލް މެދުވެރިކޮށް ފެންނަ މިފަދަ ތަކެތީގެ ފޮޓޯތަކާ އަޅާކިޔައިގެން ނެރެފައިވާ ނަތީޖާއެކެވެ.
މި ތަރިކައިގެ ތަކެތި މިހާރުވަނީ ކައުންސިލުގެ ބެލުމުގެ ދަށަށް ގެނެވިފައެވެ. އަދި މި ތަކެއްޗާމެދު ގޮތެއް ނިންމުމަށް ސަގާފީ ތަރިކަ ރައްކާތެރިކުރާ ގައުމީ މަރުކަޒާއި ކަމާގުޅޭ އެހެނިހެން ވުޒާރާތަކާއެކު މަޝްވަރާތައް ކުރިއަށްދެއެވެ. ކުރިނބީއަކީ މުއްސަނދި ތާރީޚެއް އޮތް ރަށަކަށްވުމާއެކު، މީގެ ކުރިންވެސް އެ ރަށުން އާސާރީ ގިނަ ތަކެތި ފެނިފައިވެއެވެ.
