ދާޚިލީ ވަޒީރު ޢަލީ އިޙްސާންގެ އިތުބާރު ނެތްކަމަށް ބުނެ އެމްޑީޕީން މަޖިލީހަށް ހުށަހަޅާފައިވާ މައްސަލަ ފެއިލްކޮށްލާނެ ކަމުގައި ޕީއެންސީގެ ޕީޖީ ލީޑަރ އިބްރާހިމް ފަލާޙް ވިދާޅުވެފައިވެއްޖެއެވެ.
މީޑިއާއަކަށް ދެއްވި ބަސްދީގަތުމެއްގައި ފަލާޙް ވިދާޅުވެފައިވަނީ އިޙްސާންގެ އިތުބާރު ނެތްކަމުގެ މައްސަލަ ހުށަހެޅި އިރުވެސް އެ މައްސަލަ ކާމިޔާބު ނުކުރެވޭނެކަން އެމްޑީޕީއަށް ރަނގަޅަށް އެނގޭނެ ކަމަށެވެ. އަދި އެ މައްސަލައަށް ޕީއެންސީ އަދި އެމްޑީއޭގެ އެއްވެސް މެންބަރެއްގެ ތާއީދު ނުލިބޭނެ ކަމަށާއި ޕީއެންސީގެ މެންބަރުން ވިޕްލައިނާ ޚިލާފަށް ވޯޓު ނުދެއްވާނެ ކަމަށް ފަލާޙް ވިދާޅުވެފައިވެއެވެ.
އެމްޑީޕީން އިޙްސާންގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވަނީ ޑީއެންއާރުގެ ޑޭޓާބޭސްގައި ހުރި ރައްޔިތުންގެ މަޢުލޫމާތު ބޭނުންކޮށްގެން ޕީއެންސީއަށް މެންބަރުން އިތުރުކުރުމަށް މަސައްކަތް ކުރެއްވިކަމަށް ތުހުމަތުކޮށެވެ. ނަމަވެސް އިޙްސާން ވިދާޅުވެފައިވަނީ އެ ތުހުމަތުތަކުގައި އެއްވެސް އަސްލެއް ނެތް ކަމަށެވެ.
މީގެކުރިން މަޖިލީހުގައި ވާހަކަފުޅު ދައްކަވަމުން ފަލާޙް ވިދާޅުވެފައިވަނީ ޕީއެންސީން 75،000 މެންބަރުން ހަމަކުރީ ބުރަ މަސައްކަތުން ކަމަށާއި، އެކަން ޙަޖަމް ނުވެގެން އެމްޑީޕީން ދަނީ ޙަޤީޤަތާ ޚިލާފު ވާހަކަތައް ދައްކައި މައްސަލަ ގަޑުބަޑު ކުރަމުން ކަމަށެވެ.
ދާޚިލީ ވަޒީރު ޢަލީ އިހުސާންގެ އިތުބާރު ނެތްކަމުގެ މައްސަލަ އެމްޑީޕީގެ ޕާލިމެންޓްރީ ގްރޫޕުގެ 12 މެންބަރުންގެ ސޮޔާއެކު މަޖިލީހަށް ހުށަހަޅާފައިވަނީ އިއްޔެއެވެ.
