ހޯމްލޭންޑް ސެކިއުރިޓީ އެންޑް ޓެކްނޮލޮޖީން މިއަދު ގްރޭޓާ މާލެ ސަރަހައްދުގައި ބިދޭސީންގެ މައުލޫމާތު އެއްކުރުމަށް "ކުރަނގި" އޮޕަރޭޝަން ފަށައިފިއެވެ. މިއަދު ހެނދުނު 9:15 އިން ހަވީރު 6 އަށް ކުރިއަށްދާ މި އޮޕަރޭޝަންގައި މިނިސްޓްރީގެ 75 އޮފިޝަލުން ބައިވެރިވާނެ ކަމަށް ހޯމްލޭންޑް މިނިސްޓްރީން ހާމަކޮށްފިއެވެ.
މި އޮޕަރޭޝަންގައި އެޑިއުކޭޝަން ސެކްޓަރގެ މައިގްރެންޓް ވޯކަރުންނާއި ބޮޑެތި ކުންފުނިތަކުގެ ބިދޭސީ މުވައްޒަފުންގެ މައުލޫމާތު އެއްކުރުމަށް ހަމަޖެހިފައިވެއެވެ. އަދި ތިލަފުށްޓާއި ގުޅީފަޅުގައިވެސް މި އޮޕަރޭޝަން ކުރިއަށްދާނެ ކަމަށް މިނިސްޓްރީން ބުނެފައިވެއެވެ. މީގެއިތުރުން، އެންޓި ޓިޕް އޮފީހުން މައިގްރެންޓް ވޯކަރުން ސްކްރީން ކުރުމުގެ މަސައްކަތްވެސް ކުރިއަށްގެންދާނެއެވެ.
ކުރަނގި އޮޕަރޭޝަން ފެށިފައިވަނީ 2023 ވަނަ އަހަރުގެ މޭ މަހުގެ 2 ވަނަ ދުވަހުއެވެ. މި އޮޕަރޭޝަންގެ މަޤްޞަދަކީ އެއް އަހަރު ދުވަހުގެ ތެރޭގައި ރާއްޖޭގައި ދިރިއުޅޭ ބިދޭސީންގެ މައުލޫމާތު އެއްކުރުމެވެ. ހޯމްލޭންޑް މިނިސްޓްރީގެ ތަފާސްހިސާބުތަކުން ދައްކާގޮތުގައި 2024 ވަނަ އަހަރުގެ އޮކްޓޫބަރު 22 ގެ ނިޔަލަށް 6,891 ބިދޭސީންގެ ބަޔޮމެޓްރިކް ޑާޓާ ވަނީ އެއްކުރެވިފައެވެ.
މިނިސްޓަރ އަލީ އިހުސާން ވިދާޅުވެފައިވާ ގޮތުގައި، ޕްރޮގްރާމުގެ ފުރަތަމަ މަރުހަލާގައި ބިދޭސީންގެ މައުލޫމާތު އެއްކުރި ނަމަވެސް، އެ ފަރާތްތަކާމެދު ފިޔަވަޅު އެޅުމަކީ މަޤްޞަދެއް ނޫނެވެ. އޭގެ ބަދަލުގައި، ގަވާއިދާ ޚިލާފަށް އުޅޭ ބިދޭސީންގެ ތެރެއިން ގަވާއިދުގެ ތެރެއަށް ވަންނަން ބޭނުންވާ ފަރާތްތަކަށް އެ ފުރުޞަތު ފަހިކޮށްދެވޭނެއެވެ.
ފުރަތަމަ މަރުހަލާ ނިމުމުން، ރަސްމީ ލިޔެކިޔުން ނެތި ގަވާއިދާ ޚިލާފަށް އުޅޭ ބިދޭސީންގެ ބަޔޯމެޓްރިކް އައިޑެންޓިފިކޭޝަނެއް ހަދައި، އެމްބަސީތަކާ ގުޅިގެން އެ ފަރާތްތައް އަނބުރާ ފޮނުވާލުމަށް ވަނީ ނިންމާފައެވެ. އިމިގްރޭޝަނުން ހާމަކޮށްފައިވާ ގޮތުގައި، މިދިޔަ އަހަރު ތަންފީޒީ އިދާރާތަކުގެ މަސައްކަތުން 5,613 އަށްވުރެ ގިނަ ބިދޭސީން ވަނީ ޑީޕޯޓްކޮށްފައެވެ. މި ފަރާތްތަކުގެ ތެރޭގައި ގަވާއިދާ ޚިލާފަށް އުޅެމުންދިޔަ އަދި މަސައްކަތްކުރަމުންދިޔަ ބިދޭސީން ހިމެނެއެވެ. މި ބިދޭސީންގެ ގިނަ އަދަދެއް ހޯދިފައިވަނީ އިމިގްރޭޝަނުން ހިންގި އޮޕަރޭޝަންތަކުންނެވެ.
