ފެނަކަ ކޯޕަރޭޝަން ލިމިޓެޑުން މިއަދު ހާމަކުރި ގޮތުގައި، އައްޑޫސިޓީގެ ގުޅިފައިވާ ރަށްތަކަށް ކަރަންޓު ފޯރުކޮށްދިނުމަށް ބޭނުންކުރާ ސީޕީއެސްގެ ޖެންސެޓުތަކަށް ދިމާވެފައިވާ މައްސަލައިގެ ތެރެއިން އެއް ޖެންސެޓުގެ މައްސަލަ މާދަމާ ހައްލުކުރެވޭނެއެވެ. މި މައްސަލައާ ގުޅިގެން ނެރުނު ނޫސްބަޔާނުގައި ފެނަކައިން ބުނެފައިވަނީ، މި މައްސަލައިގެ ސަބަބުން އެ ސިޓީގެ ކަރަންޓު ޚިދުމަތަށް ބުރޫ އަރާފައިވާ ކަމަށެވެ.
ޖެންސެޓުތަކުގެ މައްސަލަ ހައްލުކުރުމަށް ބޭނުންވާ ސްޕެއަރ ޕާޓްސް ހޯދުމުގެ މަސައްކަތް ކުންފުނިން ކުރަމުންދާ ކަމަށާއި، އިތުރު ސްޕެއަރ ޕާޓްސް ލިބުމާއެކު ބާކީ ހުރި ޖެންސެޓުތަކުގެ މައްސަލަވެސް ހައްލުކުރެވޭނެ ކަމަށް ފެނަކައިން ބުނެފައިވެއެވެ. މައްސަލަ ހައްލުވަންދެން ކަރަންޓުގެ ލޯޑު ހިފެހެއްޓުމަށްޓަކައި ގުޅިފައިވާ ރަށްތަކުގެ އެކި ސަރަހައްދުތަކުން ވަކި ތާވަލެއްގެ ދަށުން ކަރަންޓު ކަނޑާލެވޭނެއެވެ.
މި މައްސަލައިގެ ސަބަބުން އައްޑޫ ސިޓީގެ ގުޅިފައިވާ ރަށްތަކުގެ ރައްޔިތުންނަށް ކުރިމަތިވާނެ ދަތިތަކަށް މަޢާފަށް އެދޭ ކަމަށާއި، ވީހާވެސް އަވަހަކަށް މައްސަލަ ހައްލުކޮށް ކަރަންޓުގެ ޚިދުމަތް އާންމު ހާލަތަށް ގެނައުމަށް ފެނަކަ ޓީމުން މެދުނުކެނޑި މަސައްކަތްކުރާނެ ކަމުގެ ޔަގީންކަން ފެނަކައިން ދީފައިވެއެވެ. އަދި މިފަދා ދަނޑިވަޅުތަކުގައި ރައްޔިތުން ދެމުންގެންދާ އެއްބާރުލުމަށް ކުންފުނިން ޝުކުރު އަދާކޮށްފައިވެއެވެ.
