ފެނަކަ ކޯޕަރޭޝަނުން މިއަދު އިއުލާން ކުރި ގޮތުގައި، ކުރިއަށް އޮތް ފަސް ދުވަހަށް މޫސުން ގޯސްވާނެ ކަމަށް ލަފާކުރެވޭތީ އެ ކުންފުނީގެ އެމެޖެންސީ ރެސްޕޮންސިވް ޓީމްތައް ވަނީ ފުލް އެލަރޓަށް ގެނެވިފައެވެ.
އެކުންފުނިން ނެރުނު ބަޔާނުގައި ވިދާޅުވި ގޮތުގައި، ވިއްސާރައިގެ ސަބަބުން ދިމާވެދާނެ ނޭދެވޭ ހާދިސާތަކަށް ތައްޔާރުވުމުގެ ގޮތުން ފެނަކައިގެ ހުރިހާ ބްރާންޗްތަކެއްގައި ވެސް ކުއްލި ހާލަތްތަކަށް އިޖާބަދޭ ޓީމްތައް ވަނީ އެކުލަވާލެވިފައެވެ. މި ޓީމްތައް ވާނީ ރަށްރަށުގައި ހަރަކާތްތެރިވާ އެހެނިހެން މުއައްސަސާތަކާ ގުޅިގެން މަސައްކަތް ކުރުމަށް ތައްޔާރުވެފައެވެ.
ފެނަކައިން ޚިދުމަތް ފޯރުކޮށްދޭ 151 ރަށުގައި މި އެމެޖެންސީ ރެސްޕޮންސް ޓީމްތައް ވަނީ ޤާއިމްކުރެވިފައެވެ. މި ޓީމްތަކުގައި ޖުމްލަ 2،311 މުވައްޒަފުން ހަރަކާތްތެރިވާނެ ކަމަށް ފެނަކައިން މަޢުލޫމާތު ދެއްވިއެވެ.
ފެނަކައިން އިތުރަށް ފާހަގަކުރެއްވި ގޮތުގައި، ރައްޔިތުންގެ ސަލާމަތާއި ރައްކާތެރިކަމަށް އިސްކަންދިނުމަކީ ކުންފުނީގެ އެންމެ މުހިންމު އަސާސްތަކުގެ ތެރެއިން އެކެކެވެ. އަދި ކޮންމެފަދަ ދަތި އުނދަގޫ ހާލަތެއްގައިވެސް ރައްޔިތުންނާއެކު ދެމިތިބެ، ބޭނުންވާ އެހީތެރިކަން ފޯރުކޮށްދިނުމަށް ކުންފުނިން ވަނީ ފުރިހަމައަށް ތައްޔާރުވެފައެވެ.
ކޮމެންޓު ފޮނުވާ