ފެނަކަ ކޯޕަރޭޝަނުން މިއަދު އެ ކުންފުނީގެ މައި އޮފީސް ހިންގުމަށް އިމާރާތެއް ހޯދުމަށް އިއުލާނުކޮށްފިއެވެ. މިހާރު އެކުންފުނީގެ މައި އޮފީސް ހިންގަމުން އަންނަނީ މާފަންނުގައި ހުންނަ ޕޯޓް ކޮމްޕްލެކްސް އިމާރާތުގައެވެ. އެ ކުންފުނިން ވަނީ ކުރިން ވެސް ފަސް އަހަރު ދުވަހަށް އޮފީސް އިމާރާތެއް ހޯދުމަށް ދެ ފަހަރެއްގެ މަތިން އިއުލާނުކޮށްފައެވެ.
ސަރުކާރުގެ ގެޒެޓްގައި މިއަދު ޝާއިއުކުރި އިއުލާނުގައި ބަޔާންކޮށްފައިވާ ގޮތުގައި، ކުރިން ކުރި އިއުލާނަށް އެކަށީގެންވާ ތަރުހީބެއް ނުލިބުމާ ގުޅިގެން އަލުން އިއުލާނުކުރަން ޖެހުނީއެވެ. މި ފަހަރުގެ އިއުލާނުގައިވާ ގޮތުން، ފެނަކައިން ހޯދަނީ މާލޭގައި ހުންނަ 10،000 އަކަފޫޓަށްވުރެ ބޮޑު ތަނެކެވެ. މި އިމާރާތް ކުއްޔަށް ދިނުމަށް ބިޑުކުރާ ފަރާތްތަކުން ސެކިއުރިޓީގެ ގޮތުގައި 100،000 ރުފިޔާ ދައްކަންޖެހޭނެއެވެ. ބިޑުގައި ބައިވެރިވާން ޝައުގުވެރިވާ ފަރާތްތަކަށް ރަޖިސްޓްރީ ވެވޭނީ 2025 ވަނަ އަހަރުގެ ޖެނުއަރީ 9 ވަނަ ދުވަހުގެ މެންދުރުފަހު 3:00 އާ ހަމައަށެވެ. އަދި ބިޑު ހުށަހެޅުމުގެ ސުންގަޑިއަކީ ޖެނުއަރީ 12 ވަނަ ދުވަހުގެ ހެނދުނު 11:00 އެވެ.
ފެނަކަ ކޯޕަރޭޝަނަކީ މިހާރު ބޮޑު ގެއްލުމެއްގައި ހިންގަމުން އަންނަ ކުންފުންޏެކެވެ. އެ ކުންފުނީގެ މެނޭޖިން ޑިރެކްޓަރު ކަމުގައި ހުންނެވި މުއާޒު މުހައްމަދު ރަޝީދު ދާދި ފަހުން އިސްތިއުފާ ދެއްވުމާ ގުޅިގެން، އެމްއެންޑީއެފްގައި ގިނަ ދުވަހު ޚިދުމަތްކުރައްވާފައިވާ މުހައްމަދު ނަޖާހަށް ވަނީ އެ މަގާމު ހަވާލުކޮށްފައެވެ.
