ހއ. އިހަވަންދޫގައި ޑޮކްޔާޑެއް ތަރައްގީ ކުރުމަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ ސީއީއޯ މުހައްމަދު ވަޖީހް އިބްރާހީމެވެ. އަދި އިހަވަންދޫ ކައުންސިލްގެ ފަރާތުން ސޮއިކުރެއްވީ އެ ކައުންސިލްގެ ރައީސް އަޙުމަދު ސަބާހުއެވެ. ޑޮކްޔާޑް ތަރައްގީކުރުމަށް އިހަވަންދޫން 1،000،000 އަކަަފޫޓުގެ ބިމެއް ކައުންސިލުން ހަަމަޖެއްސިއެވެ.
އެމްޕީއެލްގެ ސީއީއޯ އިބްރާހީމް ވަޖީހު ވިދާޅުވީ، މި ސަރުކާރުން ރާއްޖޭގައި ބަންކަރިންގެ ޚިދުމަތް ފެށުމާއެކު މި ސަރަހައްދުން ދަތުރުކުރާ ބޭރުގެ އުޅަނދުތަކުގެ ފަރާތުން ޓެކްނިކަލް އެކިއެކި ކަންކަމަށް ރިކުއެސްޓް ލިބޭ ކަމަށާއި މި ޑޮކްޔާޑުން އެ އުޅަނދުތަކަށް ޓެކްނިކަލް ސަޕޯޓް ލިބިގެންދާނެ ކަމަށެވެ.
އަންނަ އަހަރު މި ޑޮކްޔާޑުގެ އަމަލީ މަސައްކަތް ފެށުމަށް އަމާޒު ހިފާފައިވާއިރު، މިހާރު ވަނީ ބިން ވެސް ހަމަޖެހިފައެވެ.
ވަޖީހު ވިދާޅުވީ، މި ޑޮކްޔާޑުން މަސްވެރިންނަށް ޚިދުމަތް ލިބޭނެ އިންތިޒާމް ހަމަޖައްސައިދިނުމަށް ގިނަ މަސްވެރި އުޅަނދުތަކުން އެދެމުންދާ ކަމަށެވެ. މި ޑޮކްޔާޑުގެ މަސައްކަތް ނިމި 6 މަސްދުވަހުގެ ތެރޭގައި ޚިދުމަތްދޭން ފެށޭނެ ކަމަށް ވަޖީހު ވިދާޅުވިއެވެ.
