ސަރުކާރުގެ ތިން މިނިސްޓްރީއެއް ހިންގަމުން ދިޔަ އިމާރާތުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާއާ ގުޅިގެން، މިއަދުން ފެށިގެން އެ މިނިސްޓްރީތަކުގެ މަސައްކަތްތައް ދަރުބާރުގޭގައި ކުރިއަށް ގެންދަން ފަށައިފިއެވެ.
މި ހާދިސާގައި އަނދައި ހުލިވެފައިވާ އިމާރާތުގައި ކުރިން މަސައްކަތް ކުރަމުން ދިޔަ ހައުސިން މިނިސްޓްރީ، އިންފްރާސްޓްރަކްޗަރ މިނިސްޓްރީ، އެންވަޔަރަމަންޓް މިނިސްޓްރީ އަދި އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ)ގެ މުވައްޒަފުން މިއަދު ވަޒީފާއަށް ނުކުތީ ދަރުބާރުގެއަށެވެ.
މިދިޔަ ހަފްތާ ބަންދުގައި ސަރުކާރުގެ މުވައްޒަފުންނާއި ސަރުކާރު ހިއްސާވާ ކުންފުނިތަކުގެ މުވައްޒަފުން ވަނީ ގިނަ މަސައްކަތްތަކެއް ކޮށް، ދަރުބާރުގެ އޮފީހެއްގެ ގޮތުގައި ބޭނުން ކުރެވޭނެ ފެންވަރަށް ތައްޔާރުކޮށްފައެވެ. އަލިފާނުގެ ހާދިސާގައި ހައުސިން މިނިސްޓްރީގެ އިމާރާތް ވަނީ ބޭނުން ނުކުރެވޭ ވަރަށް ގެއްލުންވެ، މުހިންމު ލިޔެކިޔުންތައް ގެއްލި، ގިނަ ގޮންޖެހުންތަކަކާ ކުރިމަތިވެފައެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށް ބޭރުގެ ތަޖުރިބާކާރުންގެ އެހީގައި ތަހުގީގު ކުރިއަށް ގެންދިޔުމަށް ފުލުހުން ވަނީ ނިންމާފައެވެ.
