ހދ. ކުރިނބީ އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ)ގެ ހުސްވެފައިވާ ތިން ގޮނޑިއަށް ބޭއްވުނު އިންތިޚާބުގައި ޕީއެންސީން މިއަދު ފުރިހަމަ ކާމިޔާބެއް ހޯދައިފިއެވެ.
މި އިންތިޚާބުގައި ވާދަކުރި ޕީއެންސީގެ ތިން ކެންޑިޑޭޓުންނާއި އިދިކޮޅު އެމްޑީޕީގެ ދެ ކެންޑިޑޭޓުންގެ ތެރެއިން، ޕީއެންސީގެ ފާތުމަތު ނާފިޒާ އިސްމާއީލް 163 ވޯޓާއެކު އެންމެ މަތިން ވޯޓު ހޯއްދެވިއެވެ. ދެވަނައަށް ޕީއެންސީގެ ރާނިޔާ މުހައްމަދު 162 ވޯޓު ހޯއްދަވާފައިވާއިރު، އިނާސާ އާދަމް 161 ވޯޓާއެކު ތިންވަނަ ވަނީ ހޯއްދަވާފައެވެ.
މި އިންތިޚާބު ކާމިޔާބު ކުރުމަށް ދެ ޕާޓީން ވެސް ވަރަށް ބުރަ މަސައްކަތްތަކެއް ކޮށްފައިވެއެވެ. އޭގެތެރޭގައި ޕީއެންސީގެ ރައްޔިތުންގެ މަޖިލީހުގެ ނުވަ މެންބަރުން އިއްޔެ ކުރިނބީއަށް ވަޑައިގެން ދޮރުން ދޮރަށް ވަނީ ކެމްޕޭން ކުރައްވާފައެވެ. އަދި އެމްޑީޕީގެ ބައެއް މެންބަރުން ވެސް ރަށަށް ވަޑައިގެން ކެމްޕޭން ހަރަކާތްތައް ހިންގެވިއެވެ.
ކުރިނބީ ކައުންސިލްގެ މެންބަރު ޒޫނާ އަބްދުލްމަތީން ވިދާޅުވި ގޮތުގައި މިއީ އެއްގޮތަކަށް ވެސް ކުޑަ އިންތިޚާބެއް ނޫނެވެ. ދެ ޕާޓީން ވެސް ވަރަށް ފޯރިގަދަކޮށް ވާދަކުރިއެވެ.
އިންތިޚާބުގެ މާލޭގައި ބެހެއްޓި ވޯޓު ފޮށްޓަށް ވޯޓުލުމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި އެހެން ބައެއް މެންބަރުން ވެސް ވަޑައިގެންނެވިއެވެ.
