ސްރީލަންކާ ގާނޫނުހަދާ މަޖިލީހުގެ ރައީސް އަޝޯކާ ރަންވާލާ، އޭނާގެ ތަޢުލީމީ ސަނަދުތަކާ ގުޅިގެން އުފެދިފައިވާ ކަންބޮޑުތަކާއި ގުޅިގެން މަޤާމުން އިސްތިއުފާ ދީފިއެވެ.
ގާނޫނުހަދާ މަޖިލިހުގެ ރައީސްކަމުން އިސްތިއުފާ ދެއްވެިަން، އެން.ޕީ.ޕީގެ ޕާލިމަންޓު މެންބަރު މިއަދު ހާމަކޮށްފައިވަނީ އޭނާ ނެރުއްވި ބަޔާނެއްގައެވެ.
އޭނާގެ ބަޔާނުގައި ވިދާޅުވެފައިވަނީ، ފާއިތުވި ދެތިން ދުވަހުގެ ތެރޭގައި އޭނާގެ ތަޢުލީމީ ސަނަދުތަކާ ގުޅޭ މައްސަލައެއް އުފެދިފައިވާ ކަމަށެވެ. ރަންވާލާ ޔަޤީންކޮށްދެއްވާފައިވަނީ އޭނާގެ ތަޢުލީމީ ސަނަދުތަކާ ގުޅޭގޮތުން އެއްވެސް އިރެއްގައި ދޮގު ބަޔާނެއް ދީފައިނުވާ ކަމަށެވެ.
ނަމަވެސް، އޭނާ ވިދާޅުވެފައިވަނީ މި ވަގުތު އޭނާގެ ތަޢުލީމީ ސަނަދުތައް ޔަޤީންކުރުމަށް ބޭނުންވާ ބައެއް ލިޔެކިޔުންތައް އޭނާގެ އަތުގައި ނެތް ކަމަށާއި، ކަމާބެހޭ މުއައްސަސާތަކުން އެ ލިޔެކިޔުންތައް ހޯދުމަށް އެދިފައިވީނަމަވެސް، މި ވަގުތު އަވަހަށް އެ ލިޔުންތައް ހޯދުމަކީ އުނދަގޫ ކަމެއް ކަމަށެވެ.
އެމް.ޕީ ރަންވާލާ އިތުރަށް ވިދާޅުވެފައިވަނީ އޭނާ ޕީއެޗްޑީ ދީފައިވާ ޖަޕާނުގެ ވަސެޑާ ޔުނިވަރސިޓީގެ ރިސާޗް އިންސްޓިޓިއުޓުން އެ ލިޔުންތައް ހޯދެން ހުރި ކަމަށާއި، ވީހާވެސް އަވަހަކަށް އެ ލިޔުންތައް ހުށަހަޅާނެ ކަމަށެވެ.
"ނަމަވެސް، މިހާރު މެދުވެރިވެފައިވާ ހާލަތަށް ރިޢާޔަތްކޮށް، އަދި ސަރުކާރަށާއި އަޅުގަނޑުމެންނަށް އިތުބާރުކުރި ރައްޔިތުންނަށް ދަތިވިޔަ ނުދިނުމަށްޓަކައި، އަޅުގަނޑު ޕާލިމަންޓުގެ ސްޕީކަރުކަމުގެ މަޤާމުން އިސްތިއުފާ ދިނުމަށް ނިންމައިފިން،" އޭނާ ވިދާޅުވިއެވެ.
ފަހަކަށްއައިސް އަޝޯކާ ރަންވާލާގެ ޕީއެޗްޑީއާ ގުޅޭގޮތުން އެކި ރިޕޯޓުތައް ސޯޝަލް މީޑިއާގައި ދައުރުވެ، މި މައްސަލަ އިތުރަށް ބޮޑުވެފައިވެއެވެ. އަދި ސްރީލަންކާ ޕާލިމަންޓުގެ ވެބްސައިޓުން މެންބަރުންގެ ޑައިރެކްޓަރީން އޭނާގެ ނަމުގެ ކުރިން އޮތް "ޑރ." މިހާރު ވަނީ އުނިކޮށްފައެވެ.
އިދިކޮޅު ޕާޓީތަކުން ވަނީ އޭނާއަށް ޙަޤީޤަތުގައިވެސް ޑޮކްޓަރޭޓް ލިބިފައިވޭތޯ ސާފުކޮށްދިނުމަށް އެދި، މި މައްސަލައާ ގުޅޭގޮތުން އުފެދިފައިވާ އާންމުންގެ ޝައްކުތައް ފިލުވައިދިނުމަށް ސަރުކާރަށް ގޮވާލާފައެވެ.
ގާނޫނުހަދާ މަޖިލިހުގެ ރައީސް ވަނީ އާންމު އިންތިޚާބަށް ކުރިމަތިލެއްވުމުގެ ކުރިން "ޑރ." މި ލަޤަބު ބޭނުންކުރައްވާފައިވާ ކަމަށް ބުނެވެއެވެ. މަޖިލިސް ރައީސްކަރުކަމަށް އިންތިޚާބުވުމަށްފަހު، ސްރީލަންކާ ގާނޫނުހަދާ މަޖިލިހުގެ ރަސްމީ ވެބްސައިޓުގައި އޭނާގެ ނަން ލިސްޓުކޮށްފައި އޮތީ ޑރ. އަޝޯކާ ރަންވާލާ ގެ ގޮތުގައެވެ.
ނަމަވެސް، ޔުނިވަރސިޓީ ޕްރޮފެސަރުންނާއި އެހެން ފަރާތްތަކުން ސޯޝަލް މީޑިއާގައި އޭނާގެ ޕީއެޗްޑިއަކީ ޤާނޫނީގޮތުން ދެވިފައިވާ ނުވަތަ ބަލައިގަނެވިފައިވާ އެއްޗެއްތޯ ސުވާލު އުފެދުމާއެކު މި މައްސަލަ ސަމާލުކަމަށް އައިސްފައިވެއެވެ.
މި ޝައްކުތައް އިތުރުވެފައިވަނީ ގާނޫނުހަދާ މަޖިލިހުގެ ވެބްސައިޓުން އޭނާގެ ނަމުގެ ކުރިން އޮތް "ޑރ." އުނިކުރުމުންނެވެ.
މިކަމާ ގުޅޭގޮތުން، ރަންވާލާ ވަނީ އެކަށީގެންވާ ވަގުތެއްގައި މި ތުހުމަތުތަކަށް ޖަވާބުދާރީވާނެ ކަމަށް ވިދާޅުވެފައެވެ.
ސަމަގި ޖަނަ ބަލަވެގައާ (އެސް.ޖޭ.ބީ) ޕާލިމަންޓަރީ ގްރޫޕުން، އިދިކޮޅު ލީޑަރު ސަޖިތު ޕްރެމަދާސާގެ ލީޑަރޝިޕްގެ ދަށުން، މި މައްސަލައާ ގުޅިގެން ޕާލިމަންޓުގެ ސްޕީކަރާ ދެކޮޅަށް އިތުބާރު ނެތްކަމުގެ ވޯޓަކަށް ސޮއިކުރަން ވަނީ ފަށާފައެވެ.
