މިއަދު ހެނދުނު މ. ގްރީން ބިލްޑިންގްގައި ހިނގި އަލިފާނުގެ ހާދިސާއާ ގުޅިގެން ތިމާވެއްޓާ ބެހޭ މިނިސްޓްރީ އާއި އީޕީއޭ އިން ދެމުން އަންނަ ހިދުމަތްތައް މެދުކަނޑާލަން ޖެހިފައިވާ ކަމަށް އެ މުއައްސަސާތަކުން ބުނެފިއެވެ. އެ އިމާރާތަކީ ތިމާވެއްޓާ ބެހޭ މިނިސްޓްރީ އަދި އީޕީއޭގެ މައި އޮފީސް ހިންގަމުން އަންނަ އިމާރާތެވެ.
އީޕީއޭ އިން އެކްސްގައި ކުރި ޕޯސްޓެއްގައި އަލިފާނުގެ ހާދިސާގެ ސަބަބުން ހިދުމަތްތައް މެދުކަނޑާލަން ޖެހިފައިވާ ކަމަށާއި، ހިދުމަތްތައް އަލުން ފެށުމުން އާންމުކޮށް އަންގާނެ ކަމަށް ބުނެފައިވެއެވެ. އަދި ތިމާވެއްޓާ ބެހޭ މިނިސްޓްރީން ނެރުނު ނޫސްބަޔާނެއްގައި މި ހާދިސާގައި އެ އޮފީހުގެ އެއްވެސް މުވައްޒަފަކަށް އަނިޔާއެއް ނުލިބުނު ނަމަވެސް، ހިދުމަތްތައް ވަގުތީ ގޮތުން މެދުކަނޑާލަން ޖެހިފައިވާ ކަމަށް ބުނެފައިވެއެވެ.
މ. ގްރީން ބިލްޑިންގްގައި ސަރުކާރުގެ މުހިންމު ގިނަ އޮފީސްތަކެއް ހިންގަމުން އަންނަ ކަމަށާއި، މީގެ ތެރޭގައި ތިމާވެއްޓާ ބެހޭ މިނިސްޓްރީ، ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި މާލޭ ސިޓީ ކައުންސިލްގެ ވައިޓަލް ރެޖިސްޓްރޭޝަން އޮފީސް ހިމެނޭ ކަމަށާއި، އަލިފާނުގެ ހާދިސާގައި މި ހުރިހާ ތަނަކަށް ވެސް ވަރަށް ބޮޑެތި ގެއްލުންތަކެއް ލިބިފައިވާ ކަމަށް ވަނީ އެނގިފައެވެ.
