ނޮވެމްބަރު މަހު ޒަކާތު ފަންޑުން ބޭސްފަރުވާއަށް އެހީތެރިވެދީފައިވާ މިންވަރު ދައްކައިދޭ ތަފާސް ހިސާބުތައް ހާމަކޮށްފިއެވެ. މިގޮތުން އެމަހު 61 މީހަކަށް އެހީތެރިކަން ފޯރުކޮށްދީފައިވާއިރު، އޭގެ ތެރެއިން އެންމެ ބޮޑު އަދަދެއް ހޭދަކޮށްފައިވަނީ ކެންސަރާއި ހިތުގެ އޮޕަރޭޝަންތަކަށެވެ.
ޒަކާތު ފަންޑުން އެހީތެރިކަން ފޯރުކޮށްދީފައިވާ މައިގަނޑު ދާއިރާތަކަށް ބަލާއިރު، ކެންސަރު ބަލީގެ ފަރުވާއަށް 84,810 ރުފިޔާ އަދި ހިތުގެ އޮޕަރޭޝަންތަކަށް 67,848 ރުފިޔާ ހޭދަކޮށްފައިވެއެވެ. މީގެއިތުރުން ސިކުނޑީގެ އޮޕަރޭޝަންތަކަށް 248,782.88 ރުފިޔާ އަދި ޓްރާންސްޕްލާންޓަށް 25,443 ރުފިޔާ ދޫކޮށްފައިވެއެވެ. އަދި އެހެނިހެން ބަލިތަކަށް 294,754 ރުފިޔާ ހޭދަކޮށްފައިވެއެވެ.
އެމަހު ޒަކާތު ފަންޑުން ޖުމުލަ 1,086,381.81 ރުފިޔާ ޚަރަދުކޮށްފައިވާއިރު، މީގެ ތެރެއިން 721,637.88 ރުފިޔާ ވަނީ އެހީގެ ގޮތުގައި ހަމަޖައްސާފައެވެ. އެހެނިހެން ޚަރަދުތަކުގެ ތެރޭގައި ޒަކާތާ ގުޅޭ ހޭލުންތެރިކުރުމުގެ ޕްރޮގްރާމްތައް ހިންގުމަށް 13,770 ރުފިޔާ ހޭދަކޮށްފައިވެއެވެ. އަދި ޒަކާތުގެ މަސައްކަތްތައް ކުރާ މުވައްޒަފުންގެ އުޖޫރައިގެ ގޮތުގައި ޢާމިލުންގެ ބައިން 273,410.08 ރުފިޔާ ޚަރަދުކޮށްފައިވެއެވެ.
