ގާނޫނުއަސާސީއަށް މި ފަހުން ގެނައި ބަދަލުތައް އަނބުރާ ރުޖޫއަ ކުރަންދެން ރާއްޖޭގެ ހުރިހާ ހިސާބެއްގައި އިހްތިޖާޖު ކުރަން އެމްޑީޕީގެ ގައުމީ މަޖިލިހުން ފާސްކޮށްފިއެވެ.
އެމްޑީޕީގެ ގައުމީ މަޖިލިހަށް މި ގަރާރު ހުށަހެޅުއްވީ އެމްޑީޕީގެ ކޮލަމާފުށި ދާއިރާގެ ގައުމީ މަޖިލިހުގެ މެމްބަރު މަހްފޫޒް ސައީދެވެ. އެ ގަރާރު ފާސްވީ މެމްބަރުންގެ އިއްތިފާގުންނެވެ.
މަހްފޫޒުގެ ގަރާރުގައި ވަނީ ގާނޫނުއަސާސީއަށް ގެނެސްފައިވާ ބަދަލުތަކާ ދެކޮޅަށް މުޅި ރާއްޖޭގައި އިހުތިޖާޖު ކުރުމަށެވެ. އެ ގަރާރުގައި ބުނެފައިވަނީ ހުރިހާ ޕާޓީތަކާއި ޖަމިއްޔާތަކާއި ފަންނީ ބޭފުޅުންނަށް ދައުވަތު ދީގެން ސިޔާސީ ހަރަކާތްފުޅާކޮށް ވަރުގަދަކޮށް އިހުތިޖާޖުތައް ކުރިއަށް ގެންދިއުމަށެވެ.
ގާނޫނު އަސާސީއަށް މިހާރު ގެނެސްފައިވާ ބަދަލުގެ ގޯސްކަމާމެދު ރައްޔިތުން ހޭލުންތެރި ކުރުވުމަށް ހާއްސަ މަސައްކަތްތަކެއް ކުރުމަށް ވެސް ވަނީ އެ ގަރާރުގައި ހުށަހަޅާފައިވެއެވެ.
އެމްޑީޕީން އިހުތިޖާޖަށް މި ނުކުންނަނީ ރައީސް ޑރ. މުހައްމަދު މުއިއްޒުގެ ސަރުކާރަށް އެއް އަހަރު ފުރުނު ފަހުންނެވެ. އެމްޑީޕީން އަންނަނީ މި ސަރުކާރަށް ވަރަށް ބޮޑަށް ފާޑު ކިޔަމުންނެވެ. ހާއްސަކޮށް، ރައްޔިތުންގެ ހައްގުތައް ނިގުޅައިގަނެ، އަނިޔާވެރިކަމަށް ޖާގަ ދެމުން އަންނަ ކަމަށް ބުނެ އެމްޑީޕީން ތިބީ ހިތްހަމަނުޖެހިފައެވެ.
