ކްރިމިނަލް ކޯޓުގައި މިއަދު ބޭއްވުނު އަޑުއެހުމެއްގައި، ނ. މަނަދޫ އަންނާރުމާގޭ ނައީމާ މޫސާ މަރާލުމުގެ މައްސަލާގައި ހަސަން ފަވާޒުގެ ދައުރު ސާބިތުކުރުމަށް ދައުލަތުން ވަރަށް ގިނަ ހެކިތަކެއް ހުށަހަޅައިފިއެވެ.
މިދިޔަ އަހަރުގެ އޭޕްރީލް 7 ވަނަ ދުވަހު، އެކަނި ދިރިއުޅެމުންދިޔަ 62 އަހަރުގެ ނައީމާ މޫސާ، ގިނަ ޒަހަމްތަކާއެކު މަރުވެފައި އޮއްވާ ފެނުނީ، ޢާއިލާއިން ހަބަރެއް ނުވާތީ ފުލުހުންނަށް އެންގުމާ ގުޅިގެންނެވެ. މިމައްސަލާގައި 21 އަހަރުގެ ހަސަން ފަވާޒް، 23 އަހަރުގެ އަހްޒަމް އަބްދުއްޝަކޫރު، އަދި 20 އަހަރުގެ އަބްދުލްވާހިދު ރިފާސްގެ މައްޗަށް ދައުލަތުން ދަޢުވާ އުފުލާފައިވެއެވެ.
ފަވާޒުގެ މައްޗަށް ކުރެވިފައިވާ ދަޢުވާތަކުގެ ތެރޭގައި، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމާއި، މައްޔިތާގެ ބޭނުން ނަހަމަ ގޮތުގައި ހިފުމާއި، އަދުލު އިންސާފު ގާއިމްކުރުމަށް ހުރަސްއެޅުން ހިމެނެއެވެ. ދައުލަތުން ބުނާގޮތުގައި، ނައީމާއަކީ ސިހުރުވެރިއެއްކަމަށް ބުނެ، ސިހުރުވެރިން މެރުމަކީ ފާފައެއް ނޫންކަމަށް ފަވާޒު ރިފާސް އަދި އަހުޒަމަށް ވިސްނައިދީ، އޭނާގެ ކާރުގައި އެމީހުން ނައީމާގެ ގެއަށް ގެންގޮސް، ފޯނުން އިރުޝާދު ދެމުން ގޮސްފައިވެއެވެ.
މިކަންކަން ސާބިތުކުރުމަށް، ސެލް ލޮކޭޝަންތަކާއި، ކޯލް ރެކޯޑިންތަކާއި، ޝަފަހީ ހެކިންގެ ބަޔާންތަކާއި، ސީސީޓީވީ ފުޓޭޖްތައް ހުށަހެޅިފައިވެއެވެ. މީގެއިތުރުން، ނައީމާއަކީ ސިހުރުވެރިއެއްކަމަށް ރަށުތެރޭގައި ދެކެވޭ ވާހަކަތަކާއި، އެކަމާމެދު ފަވާޒު ރުޅިއައިސްފައިވާކަން ސާބިތުކުރުމަށް ރަށުގެ މީހުންގެ ހެކިބަހާއި، މަރާލުމަށް ބޭނުންކުރި އާލާތްތައް ހޯދުމަށް ފަވާޒު ހަރަދުކުރިކަން ދައްކުވައިދޭ ހެކިތަކާއި، ފޮރެންސިކް ތަހުލީލު ރިޕޯޓުތައްވެސް ހުށަހެޅިފައިވެއެވެ.
