ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި "ބިންވެރިޔާ" ސްކީމްގެ ދަށުން ހުޅުމާލެ އިން ހިލޭ ދޫކުރި 1،380 ގޯތީގެ އަގު 5.4 ބިލިއަން ރުފިޔާ އަށް އަރާ ކަމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ވިދާޅުވެއްޖެއެވެ.
ބިންވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހިން ދޭން ޖެހޭ 1،380 ގޯތި ވަނީ ދީ ނިންމައިފައެވެ. ހުޅުމާލެ އިން މިހާރު ނުދީ އޮތީ ތިން ވަނަ ފިޔަވަހިން ދޭން ޖެހޭ 699 ގޯއްޗެވެ. އެ ގޯތިތައް ހަވާލު ކުރުމަށް ބިން ހިއްކުމުގެ މަސައްކަތް އެޗްޑީސީން ވަރަށް ހަލުވިމިނެއްގައި ދަނީ ކުރަމުންނެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީގައި ވާހަކަ ދައްކަވަމުން ފަޒުލް ވިދާޅުވީ ބިންވެރިޔާ ސްކީމުގެ ދަށުން 5.4 ބިލިއަން ރުފިޔާ ލިބެން ޖެހޭ އިރު މިހާ ހިސާބަށް އޭގެ އެއްވެސް މުއާމާލާތެއް ނުހިނގާ ކަމަށެވެ. އޭނާ ވިދާޅުވި ގޮތުގައި އެ ފައިސާއަކީ ސަރުކާރުން ދޭން ޖެހޭ އެއްޗެކެވެ.
"އެ ޕްރޮސެސް އަދި އިނީޝިއޭޓް ނުކުރެވި އޮތީ، މި ސަރުކާރުން އެކަން ކުރިއަށް ގެންދަނީ،". ފަޒުލް ވިދާޅުވިއެވެ.
"5.4 ބިލިއަން ރުފިޔާ އަކީ ބިންވެރިޔާ ސްކީމުގެ ކޮމްޕެންސޭޝަނެއްގެ ގޮތުގައި ހުށަހަޅައިގެން އުޅޭ އަގެއް. ސަރުކާރުން އެ ދެއްވާފައި ހުރި އިރު ހުޅުމާލެއިން 5.4 ބިލިއަންގެ އިތުން ތިން ވަނަ ފިޔަވަހި ހިއްކާ ޕްރޮޖެކްޓް ވެސް ކުރިއަށް ގެންދަން ޖެހޭ،"
ބިންވެރިޔާ ސްކީމްގެ ދަށުން ގޯތި ދޫކޮށްފައި ވަނީ ހުޅުމާލެ 2 އާއި އަލަށް ހިއްކާ ހުޅުމާލެ ތިނަކާއި ގުޅިފަޅާއި ގިރާވަރުފަޅުންނެވެ. އެތަންތަނުން 9،000 އަށް ވުރެ ގިނަ ގޯތި ދޭނެއެވެ.
