ރޭގަނޑުގެ ވަގުތެއްގައި ކުރު މުއްދަތަކަށް އިޢުލާންކުރި މާޝަލް ލޯގެ ފަހުން، ރައީސް ޔޫން ސުކް-ޔޯލް ވަގުތުން އިސްތިއުފާ ނުދޭނަމަ، އިމްޕީޗްމަންޓްގެ މަރުހަލާތައް (މަގާމުން ވަކިކުރުމުގެ މަރުހަލާތައް) ފަށާނެ ކަމަށް ސައުތު ކޮރެއާގެ މައި އިދިކޮޅު ޕާޓީން ބުނެފިއެވެ.
ބުދަ ދުވަހު ނެރުނު ބަޔާނެއްގައި ޑިމޮކްރެޓިކް ޕާޓީން ބުނެފައިވަނީ، ޔޫން ވަގުތުން އިސްތިއުފާ ނުދޭނަމަ، އިމްޕީޗްމަންޓްގެ މަރުހަލާތައް ވަގުތުން ފަށާނެ ކަމަށެވެ.
"އޭނާގެ މާޝަލް ލޯ އިޢުލާނަކީ އަސްލު ބާތިލް އަދި ޤާނޫނު އަސާސީއާ ހިލާފު ކަމެކެވެ. އެއީ ބޮޑު އަމަލެއް އަދި އިމްޕީޗްމަންޓަށް ފުރިހަމަ ހެއްކެކެވެ." އެ ޕާޓީން ބުނެފައިވެއެވެ.
ޔޫން އިމްޕީޗްކުރުމަށް ޕާލަމެންޓްގެ ތިން ބައިކުޅަ ދެބައި (300 މެންބަރުންގެ ތެރެއިން 200 މެންބަރުން)ގެ ތާއީދު ބޭނުންވެއެވެ. ޑިމޮކްރެޓިކް ޕާޓީ އާއި އެހެން ކުދި އިދިކޮޅު ޕާޓީތަކަށް ޖުމްލަ 192 ގޮނޑި ލިބިފައިވެއެވެ. ނަމަވެސް ޕާލަމެންޓުން ޔޫންގެ މާޝަލް ލޯ އިޢުލާން 190-0 ވޯޓުން ބާތިލުކުރިއިރު، ޔޫންގެ ވެރިކަންކުރާ ޕީޕަލްސް ޕަވަރ ޕާޓީގެ 10 މެންބަރުން ވެސް ވަނީ ބާތިލުކުރުމަށް ވޯޓުދީފައެވެ.
ޔޫން އިމްޕީޗްކޮށްފިނަމަ، ޤާނޫނު އަސާސީން ލިބިދޭ ބާރުތައް ކޮންސްޓިޓިއުޝަނަލް ކޯޓުން އޭނާގެ މައްޗަށް ގޮތެއް ނިންމަންދެން ހިފެހެއްޓޭނެއެވެ. އޭރުން ބަންޑާރަ ނައިބު ހާން ޑަކް-ސޫ، ސަރުކާރު ހިންގުމާ ހަވާލުވެ، ގައުމު ހިންގުމުގެ މަސްއޫލިއްޔަތުތައް އަދާކުރައްވާނެއެވެ.
ޔޯންހަޕް ނިއުސް އޭޖެންސީން ރިޕޯޓުކުރި ގޮތުގައި ޔޫންގެ އިސް އެހީތެރިން ވަނީ އެއްފަހަރާ އިސްތިއުފާ ދިނުމަށް ހުށަހަޅާފައެވެ.
40 އަހަރަށްވުރެ ގިނަ ދުވަހުގެ ފަހުން އިޢުލާންކުރި ފުރަތަމަ މާޝަލް ލޯ އިޢުލާނުން، ސައުތު ކޮރެއާގެ ކުރީގެ އަސްކަރީ ސަރުކާރުތަކުގެ ދުވަސްވަރު، ސަރުކާރާ ދެކޮޅު މުޒާހަރާތައް ހުއްޓުވުމަށް، މަގުތަކާއި ސްކޫލްތައް ފަދަ އާންމު ތަންތަނުގައި ހަނގުރާމަވެރި ސިފައިންނާއި ޓޭންކުތަކާއި ހަތިޔާރު ރައްކާތެރިކުރެވިފައިވާ އުޅަނދުތައް ބޭއްވުމަށް މާޝަލް ލޯ އާއި އެހެނިހެން އަމުރުތައް ނެރެފައިވާ ދުވަސްވަރުގެ ހަނދާން ވަނީ އާވެގެން ގޮސްފައެވެ.
ގިނަ ބަޔަކު ދެކޭގޮތުގައި ރައީސް ޔޫންގެ އަމަލުތައް ހުރިގޮތުން މި ޒަމާނުގެ ޑިމޮކްރެޓިކް ތާރީޚުގައި އެންމެ ބޮޑު ބިރުވެރިކަމެއްގެ ތެރެއަށް އެގައުމު ވަނީ ވައްޓާލާފައެވެ. އަދި ދުނިޔޭގެ ގާތް އެކުވެރިން ވެސް ވަނީ ހައިރާންކޮށްލާފައެވެ.
އަންގާރަ ދުވަހުގެ ރޭ އުތުރު ކޮރެއާ އާއި "އެންޓި-ސްޓޭޓް ފޯސަސް" ގެ ބިރަށް ކަމަށް ބުނެ އިޢުލާންކުރި މާޝަލް ލޯ ޕާލަމެންޓްގެ މެންބަރުން އިދިކޮޅު ހެދުމުން ޔޫން ވަނީ އެކަމުން ފަހަތަށް ޖެހިފައެވެ.
ނޭޝަނަލް އެސެމްބްލީ ޕާލަމެންޓް ބޭރުގައި މުޒާހަރާކުރި މީހުން އަޑުގަދަކޮށް އަތްތިލަބަޑިޖަހާފައިވެއެވެ. "އަހަރެމެން މޮޅުވެއްޖެ!" އެމީހުން ހަޅޭއްލަވާފައިވެއެވެ.
ސައުތު ކޮރެއާގެ އެންމެ ބޮޑު ޔޫނިއަން ކޯލިޝަން، ކޮރެއަން ކޮންފެޑެރޭޝަން އޮފް ޓްރޭޑް ޔޫނިއަންސްއިން ބުނެފައިވަނީ، ޔޫން އިސްތިއުފާ ދެންދެން އެތައް ހާސް މެންބަރުން ހަޅުތާލުކޮށް، ސިއޯލްގެ މެދުތެރޭގައި ރޭލީއެއް ބާއްވާނެ ކަމަށެވެ.
އިތުރު މުޒާހަރާތަކެއް ބޭއްވުމަށް ހަމަޖެހިފައިވާއިރު، އޭގެ ތެރޭގައި ނޭޝަނަލް އެސެމްބްލީ ކައިރީގައި ވެސް މުޒާހަރާތައް ހިމެނެއެވެ. އަންގާރަ ދުވަހުގެ ރޭ އެތައް ހާސް މީހުން އެތަނުގައި އެއްވެ، ފުރަތަމަ ޔޫންގެ އަމުރު ހުއްޓުވުމަށް އަދި އޭގެ ފަހުން އޭނާ ހައްޔަރުކޮށް އިސްތިއުފާ ދިނުމަށް ގޮވާލާފައިވެއެވެ.
