އެމްޑީޕީގެ ޗެއާޕާސަން ފައްޔާޒް އިސްމާއީލް، ޕާޓީގެ ރައީސް އަބްދުﷲ ޝާހިދަށް އެންގުމަކާ ނުލައި ޕާޓީގެ ނަމުގައި މަސްވެރިންނާ ބައްދަލު ކުރުމުން، އެކަމާ ހިންހަމަޖެހުވަޑައިނުގެން، ޕާޓީގެ ރައީސް އަބުދުﷲ ޝާހިދު ޝަކުވާ ކުރައްވައިފިއެވެ.
2028 ވަނަ އަހަރުގެ ރިޔާސީ އިންތިޚާބަށް މިހާރުއްސުރެ އެމްޑީޕީ ތެރޭގައި ވާދަވެރިކަން ބޮޑުވެފައިވާއިރު، އެންމެ ބޮޑަށް ފާހަގަކުރެވެނީ ފައްޔާޒާއި ޝާހިދުގެ ދެމެދުގައި ހިނގަމުންދާ ކޯޅުމެވެ.
ފައްޔާޒާއި އޭނާގެ ފެކްޝަންގެ މީހުން މިއަދު ވަނީ މަސްވެރިންގެ ހާލަތު އޮޅުންފިލުވުމަށް ކަމަށްބުނެ މަސްމާރުކޭޓު ސަރަހައްދަށް ވަޑައިގެން، ބައެއް މަސްވެރިންނާ ބައްދަލުކޮށް، މަސްދޯނިތަކަށް އަރައި ވާހަކަދެއްކި މަންޒަރުތައް އެމްޑީޕީގެ ރަސްމީ "އެކްސް" އެކައުންޓުގައި ހިއްސާކޮށްފައެވެ. ފައްޔާޒާއެކު އެމްޑީޕީގެ ޕީޖީ ލީޑަރު އިބްރާހިމް ނާޒިލާއި، އަލިފުށީ ދާއިރާގެ ކުރީގެ މެންބަރު މުޙައްމަދު ރަޝީދު (ބިގޭ) ވެސް ބައިވެރިވެފައިވެއެވެ.
މި ހަރަކާތާ ގުޅިގެން އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕުގައި ޝާހިދު ވަނީ ކަންބޮޑުވުން ފާޅުކޮށް، ޕާޓީގެ ރައީސަށް ނާންގައި މިފަދަ ހަރަކާތްތައް ހިންގަނީ ޕާޓީގެ އިސްވެރިންގެ ތެރޭގައި ރައީސް ނުހިމެނޭތީތޯ ސުވާލުކޮށްފައެވެ. މި ސުވާލުގެ ރައްދުގައި ފައްޔާޒް ވަނީ ޕާޓީގެ "އެކްސް" ހޭންޑްލް އުވައިލަން ހުށަހަޅައި، ޝާހިދަށް ނިސްބަތްކޮށް "ކުޑަކުދިން މާގިނައީ" ކަމަށް ބުނެފައެވެ.
އަދި އޭގެފަހުން 2028 ގެ ރިޔާސީ އިންތިޚާބަށް އެމްޑީޕީގެ ޕްރައިމަރީގައި ވާދަކުރައްވާނެކަން ގައުމީ މަޖިލީހުގެ ވަޓްސްއެޕް ގްރޫޕުގައި ފައްޔާޒު އިޢުލާންކޮށްފައިވެއެވެ.
އެމްޑީޕީގެ ރިޔާސީ ޓިކެޓަށް މިހާރު ވާދަކުރުމަށް ތައްޔާރުވަމުންދަނީ އިބްރާހިމް މުޙައްމަދު ޞާލިޙް، ފައްޔާޒް އިސްމާޢީލް، ޢަބްދުﷲ ޝާހިދު، މާލޭ ސިޓީގެ މޭޔަރު އާދަމް ޢާޒިމް، އަދި އަޙްމަދު ސަލީމް (ހޯރަފުށީ ސައްލެ) އެވެ.
މިހާރު ފައްޔާޒްގެ ކޮންޓްރޯލްގައިވާ އެމްޑީޕީގެ ރަސްމީ ވެބްސައިޓުގައި ޕާޓީގެ އިސްފަރާތްތަކުގެ ވަނަވަރު ހިމަނާފައިވާއިރު، ފައްޔާޒް ފިޔަވައި އެހެން އެއްވެސް މީހެއްގެ މާބޮޑު ތަފްސީލެއް ހިމަނާފައެއް ނުވެއެވެ. މިއީ ޕާޓީގެ ލީޑަޝިޕްގައި ރިޔާސީ ޓިކެޓަށް އޮތް ވާދަވެރިކަމުގެ ރަމްޒުކޮށްދޭ ކަމެއްކަމަށްވެސް ގިނަބަޔަކު ދެކެއެވެ.
ރިޔާސީ ޓިކެޓުގެ މައްސަލައިގައި އެމްޑީޕީ ތެރޭގައި ބައިބައިވުން އުފެދި، ލީޑަޝިޕްގެ މެދުގައި ގުޅުންތައް ކުޑަކަމަށް ގިނަބަޔަކު ދަނީ ބުނަމުންނެވެ. އިދިކޮޅުގައި އޮވެ އެކަތިގަނޑެއްގެ ގޮތުގައި މަސައްކަތްކުރަމުންދާކަމަށް އެޕާޓީން ދައްކަމުން އައިނަމަވެސް، އެމްޑީޕީ މިވަގުތު އޮތީ އެކި ފެކްޝަންތަކަށް ބެހިފައިކަން ފާހަގަ ކޮށްލެވެއެވެ.
