އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގުގެ ދައުރު މިއަދު ހަމަވާނެއެވެ.
ފުއާދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މިއަދަކީ އިލެކްޝަންސް ކޮމިޝަންގައި އޭނާ ހޭދަކުރައްވާނެ ފަހު ދުވަސް ކަމަށެވެ. ފުއާދު ވަނީ އިންތިގާލީ މަރުހަލާގެ ތެރޭގައި އޭނާއާ އެކު މަސައްކަތް ކުރެއްވި އީސީގެ މެމްބަރުންނާއި ފުރަތަމަ ދައުރުގައި އީސީގައި ތިއްބެވި ހުރިހާ މެމްބަރުންނަށާއި މުވައްޒަފުންނަށް ޝުކުރު އަދާކުރައްވައިފައެވެ.
އަދި ރައީސް ކަމުގެ މަގާމުގައި ހުންނެވިއިރު، ސިޔާސީ ޕާޓީތަކަށާއި މުއައްސަސާތަކާއި، ރައްޔިތުން ދެއްވި އިތުބާރާއި އެއްބާރުލުމަށް ޝުކުރު ދަންނަވާ ކަމަށް ފުއާދު ވިދާޅުވިއެވެ.
އީސީގެ ގާނޫނު ބުނާ ގޮތުން ދެ ދައުރަށް ވުރެ އިތުރަށް އެ ކޮމިޝަންގެ މެމްބަރު ކަމުގައި ނުހުންނެވޭނެއެވެ. ފުއާދަކީ 1978 ވަނަ އަހަރުން ފެށިގެން ރާއްޖޭގައި ބައްވަމުން އަންނަ އެކިއެކި އިންތިހާބުތައް ކުރިއަށް ގެންދެވުމުގައި އިސްކޮށް އުޅުއްވި ބޭފުޅެކެވެ.
ފުއާދަކީ ރާއްޖޭގައި މިހާތަނަށް ބޭއްވި އެންމެ ބޮޑެތި އިންތިހާބުތަކުގައި އިލެކްޝަންސް ކޮމިޝަންގެ ވެރިއެއްގެ ގޮތުގައި މަސައްކަތް ކުރެއްވި ބޭފުޅާއެވެ. އޭގެ ތެރޭގައި 2008 ވަނަ އަހަރު ބޭއްވި ރިޔާސީ އިންތިހާބާއި 2023 ވަނަ އަހަރު ބޭއްވި ރިޔާސީ އިންތިހާބު ހިިމެނެއެވެ.
ފުއާދަކީ ސިޔާސީ ގިނަ ބޭފުޅުންތަކެއް އިތުބާރު ކުރައްވާ ބޭފުޅެކެވެ.
ފުއާދުގެ ދައުރު މިއަދު ހަމަވާތީ އީސީގެ މެމްބަރު ކަމަށް އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުލް ހަސީބް އިސްމާއިލް އައްޔަން ކުރަން މަޖިލީހަށް މިހާރު ވަނީ ފޮނުވާފައެވެ. މަޖިލީހުގެ ރިޔާސަތުން ވަނީ މި މައްސަލަ މިނިވަން މުއައްސަސާތަކުގެ ކޮމިޓީއަށް ފޮނުވާފައެވެ.
