ޒަކާތު ހައުސްއިން އާންމުކުރި ފާއިތުވި އޮކްޓޯބަރު މަހުގެ ތަފާސްހިސާބުތަކުން ދައްކާގޮތުގައި 124 މީހުންގެ ބޭސްފަރުވާއަށް ޖުމުލަ 529,702 ރުފިޔާ ޚަރަދުކޮށްފައިވެއެވެ. މީގެ ތެރެއިން އެންމެ ބޮޑު ޚަރަދެއް ކޮށްފައިވަނީ ކެންސަރު ބަލީގެ ފަރުވާއަށް ކަމަށްވާއިރު، އެއީ 348,037.50 ރުފިޔާއެވެ.
ކިޑްނީ ބަލިތަކަށް 80,569.50 ރުފިޔާ ހޭދަކޮށްފައިވާއިރު، ހިތާއި ސިކުނޑީގެ އޮޕަރޭޝަންތަކަށް އެއްވަރެއްގެ އަދަދެއް ކަމަށްވާ 67,848 ރުފިޔާ ޚަރަދުކޮށްފައިވެއެވެ. އަދި ޓްރާންސްޕްލާންޓަށް 25,443 ރުފިޔާ ހޭދަކޮށްފައިވެއެވެ.
އެހެނިހެން ޚަރަދުތަކުގެ ގޮތުގައި 470,696 ރުފިޔާ ޚަރަދުކޮށްފައިވާއިރު، މީގެ ތެރޭގައި އިދާރީ މުވައްޒަފުންގެ އުޖޫރައަށް ދެ ލައްކަ ރުފިޔާއާއި ރާއްޖެއިން ބޭރަށް ކުރި ދަތުރުތަކަށް 92,363.04 ރުފިޔާ ހިމެނެއެވެ. ޒަކާތު ހައުސްއިން ފާހަގަކުރިގޮތުގައި މި ތަފާސްހިސާބުތަކުގައި ސެޕްޓެންބަރު މަހު އެހީ ހަމަޖެހުނު ފަރާތްތަކުގެ ޚަރަދުތައްވެސް ހިމެނިފައިވެއެވެ.
ޒަކާތު ހައުސްއިން ކޮންމެ މަހަކުވެސް މިސްކީނުންނާއި ފަގީރުންގެ ބޭސްފަރުވާއަށް އެހީގެ ގޮތުގައި ދެވުނު ޚަރަދުތަކުގެ ތަފްސީލު އާންމުކުރަމުން ގެންދެއެވެ.
