ހުޅުމާލޭގެ އެޕާޓްމަންޓަކަށް ވަދެ އެ ތަނުގައި ހުރި މުދަލަށް ގެއްލުން ދިން މައްސަލައެއް ފުލުހުން ބަލަން ފަށައިފިއެވެ.
ފުލުހުން ބުނީ މިއަދު ހެނދުނު 6:32 ހާއިރު ހުޅުމާލެ ވަން އެވެނިއު އެޕާޓްމަންޓަކަށް ވަދެ މުދަލަށް ގެއްލުން ދިން މައްސަލައެއް ފުލުހުންނަށް ރިޕޯޓުކޮށްފައިވާ ކަމަށެވެ. މިި މައްސަލައާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުންޏެވެ.
މި މައްސަލައިގައި އެއްވެސް މީހަކު ހައްޔަރުކޮށްފައެއް ނުވެއެވެ.
ސޯޝަލް މީޑިއާގައި ވަނީ އެ އެޕާޓްމެންޓަށް ވަދެ މުދަލަށް ގެއްލުންދިން އަންހެނަކާއި ފިރިހެނެއްގެ ފޮޓޯ އާންމުކޮށްފައެވެ. އެ ފޮޓޯއާ އެކުގައި ހިއްސާކުރި މައުލޫމާތުން އެނގޭ ގޮތުގައި އެ ދެ މީހުން ވަނީ އެޕާޓްމަންޓްގައި ތިބި މީހުންނަށް މަރުގެ އިންޒާރު ވެސް ދީފައެވެ.
