މިއަހަރު ނިމުމުގެ ކުރިން މާލެ ސަރަޙައްދުގެ ސަރުކާރުގެ ހޮސްޕިޓަލްތަކުގެ އޮޕަރޭޝަން ތިއޭޓަރުތަކުގެ އަދަދު 12 އަށް އިތުރުކުރުމަށް ހަމަޖެހިފައިވާ ކަމުގައި ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވެެއްޖެއެވެ.
ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން ހަލީމް ވިދާޅުވީ މިވަގުތު އައިޖީއެމްއެޗްއާއި ދަރުމަވަންތަ ހޮސްޕިޓަލުގައި ހިދުމަތް ދެމުންދަނީ 4 އޮޕަރޭޝަން ތިއޭޓަރުގައި ކަމަށެވެ. ނަމަވެސް އައިޖީއެމްއެޗްގެ އެނދުގެ އަދަދު އިތުރުވުމާއެކު އޮޕަރޭޝަން ތިއޭޓަރުގެ އަދަދު 8 އަށް އަރާނެކަމަށް ވިދާޅުވިއެވެ.
ހުޅުމާލޭގައި ބޮޑު އާބާދީއެއް އޮތް ނަމަވެސް މިހާތަނަށް ހުޅުމާލެ ހޮސްޕިޓަލުގައި އައިސީޔޫއެއް ނެތްކަން އަބްދުއްރައްޒާގު ޙަލީމް ފާހަގަކުރެއްވިއެވެ. އެހެންނަމަވެސް ކުރިއަށް އޮތް މަދު ދުވަސްތަކުގެ ތެރޭގައި ބޮޑެތި ތަރައްގީގެ މަޝްރޫއުތަކެއް ނިންމައި ހިދުމަތް ދޭން ފެށޭނެކަމަށް ވިދާޅުވިއެވެ.
ހުޅުމާލެ ހޮސްޕިޓަލް ތަރައްގީ ކުރުމުގެ މަސައްކަތުގެ ތެރެއިން 4 އޮޕަރޭޝަން ތިއޭޓަރާއި 14 އެނދުގެ އެންއައިސީޔޫއަކާއި 10 އެނދުގެ އައިސީޔޫއެއް ތަރައްގީކުރުމުގެ މަސައްކަތް ކުރިއަށްދާ ކަމަށާއި، މިއާއެކު އައިޖީއެމްއެޗަށް ބާރުބޮޑުވާ މައްސަލައަށް ހައްލެއް ލިބޭނެކަމަށް އޭނާ ވިދާޅުވިއެވެ.
އައިޖީއެމްއެޗްގެ ތަފާސް ހިސާބުތަކުން ދައްކާގޮތުން އިމަޖެންސީއާއި ޖެނެރަލް ޕްރެކްޓިސްއަށް 150،000 އަށްވުރެ ގިނަ މީހުން ޒިޔާރަތްކޮށްފައިވާއިރު، އޯޕީޑީ ކޮންސަލްޓޭޝަންގެ ހިދުމަތް ހޯދުމަށް 240،000 މީހުން ޒިޔާރަތްކޮށްފައިވެއެވެ. ހުޅުމާލެ ހޮސްޕިޓަލަށް ޑޮކްޓަރަށް ދެއްކުމަށް 238،000 އަށްވުރެ ގިނަ މީހުން ޒިޔާރަތްކޮށްފައިވެއެވެ.
އައިޖީއެމްއެޗްގެ ހިދުމަތްތައް ލުއިފަސޭހަކޮށް އަވަސްކުރުމަށް މުހިއްމު ބަދަލުތަކެއް ގެންނަމުންދާއިރު، ސަރުކާރު ހޮސްޕިޓަލުތަކުގެ ކިއު ދިގުވެ، ޑޮކްޓަރަށް ދެއްކުމަށް ހޭދަވާ ވަގުތު ކުޑަކުރުމަށް މާލޭގެ 4 ސަރަހައްދެއްގައި ސަރުކާރުގެ ޖެނެރަލް ޕްރެކްޓިސް ކްލިނިކްތަކެއް ގާއިމްކުރުމުގެ މަސައްކަތްވެސް ފެށިފައިވެއެވެ.
