ޗައިނާގެ ލޮލުގެ ޑޮކްޓަރުންގެ ޓީމުން ރާއްޖޭގައި ކުރިއަށްގެންދާ ހާއްސަ ކޭމްޕްގައި ވޭތުވެދިޔަ ތިން ދުވަހުގެ ތެރޭގައި 60 އަށްވުރެ ގިނަ ސާޖަރީ ހަދާފައިފިއެވެ. ޗައިނާ ސަރުކާރުގެ އިސްނެގުމުގެ މަތިން ރާވާފައިވާ މި ކޭމްޕް ކުރިއަށްދަނީ ހުޅުމާލެ ހޮސްޕިޓަލުގައެވެ.
މި ކޭމްޕް ކުރިއަށްދާ ގޮތް ބެއްލެވުމަށާއި ފަރުވާ ހޯދާ މީހުންނާ ބައްދަލުކުރެއްވުމަށް ސިއްޙަތާ ބެހޭ ވަޒީރު ޢަބްދުﷲ ނާޒިމް ވަނީ ހޮސްޕިޓަލަށް ޒިޔާރަތްކުރައްވާފައެވެ. މި ޒިޔާރަތުގައި ޗައިނާގެ އެމްބެސެޑަރ ވާން ލިޖިންގެ އިތުރުން ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމްވެސް ބައިވެރިވެވަޑައިގެންނެވިއެވެ.
ޗައިނާގެ އެމްބެސެޑަރ ވާން ލިޖިން ވިދާޅުވި ގޮތުގައި މިހާތަނަށް 60 އެއްހާ ސާޖަރީ ހަދައި، ދިވެހިންނަށް ފަރުވާ ދީފައިވެއެވެ. އަދި ރާއްޖެއާއި ޗައިނާގެ ގުޅުމުގެ ސަބަބުން ދިވެހި ރައްޔިތުންނަށް ލިބޭ ފައިދާތަކާމެދު އުފާކުރައްވާ ކަމަށްވެސް ވިދާޅުވިއެވެ.
މި ކޭމްޕްގައި ލޮލުގެ އެކި ބަލިތަކަށް ފަރުވާ ދިނުމުގެ އިތުރުން ލެންސު ނުސާފުވެފައިވާ މީހުންނަށް ހާއްސަ ސާޖަރީތަކެއް ހެދުމުގެ ހިދުމަތްވެސް ދެމުން ގެންދެއެވެ.
2016 އިން ފެށިގެން ކުރިއަށްގެންދާ މި ކޭމްޕުގެ މިއަހަރުގެ ހަރަކާތް ފެށިފައިވަނީ މި މަހުގެ 5 ވަނަ ދުވަހުއެވެ. ވޭތުވެދިޔަ އަހަރުތަކުގައި މި ކޭމްޕުތައް މެދުވެރިކޮށް 5،000 އަށްވުރެ ގިނަ މީހުންނަށް ފަރުވާދީ، 600 އަށްވުރެ ގިނަ މީހުންގެ ލޮލުގެ ސާޖަރީ ހަދާފައިވެއެވެ. އަދި 2020 ވަނަ އަހަރު ވަނީ ހުޅުމާލެ ހޮސްޕިޓަލުގައި ޗައިނާ ސަރުކާރުގެ އެހީގައި ކްލިނިކްއެއް ގާއިމްކޮށްފައެވެ.
