2026 ވަނަ އަހަރުގެ ފެބްރުއަރީ މަހުގެ ކުރިން އަތޮޅުތަކުގައި ޤާއިމްކުރެވޭ ހުރިހާ ޕޮއިންޓްތަކަކުން މަސްވެރިންނަށް ތެޔޮ ލިބޭނެ އިންތިޒާމް ހަމަޖެހިގެންދާނެ ކަމަށް އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވެއްޖެއެވެ.
މުޅި ރާއްޖޭގައި ފިއުލް ސްޓޯރޭޖް ޤާއިމްކުރުމުގެ މަޝްރޫޢު އިފްތިތާހުކުރުމަށް ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން، ޝިމާދު ވިދާޅުވީ 2025 ވަނަ އަހަރުގެ އޮކްޓޯބަރު މަހުގެ ނިޔަލަށް ހއ. އިހަވަންދޫ، ހދ. ހަނިމާދޫ، ފ. ނިލަންދޫ، ގދ. ފަރެސްމާތޮޑާ އަދި ފުވައްމުލަކު ސިޓީގައި މި ޚިދުމަތް ޤާއިމްކުރެވިގެންދާނެ ކަމަށެވެ. އަދި 2026 ވަނަ އަހަރުގެ ފެބްރުއަރީ މަހުގެ ނިޔަލަށް ށ. މިލަންދޫ، ނ. މަނަދޫ، ބ. ތުޅާދޫ، ވ. ފެލިދޫ، ތ. ހިރިލަންދޫ، ރ. ދުވާފަރު، އއ. މަތިވެރި، މ. މުލައް، ދ. ކުޑަހުވަދޫ އަދި ލ. ގަމުގައި މި ޚިދުމަތް ފޯރުކޮށްދެވޭނެ ކަމަށެވެ.
މި މަޝްރޫޢުގެ މަޤްޞަދަކީ ރާއްޖޭގެ ކޮންމެ އަތޮޅެއްގައި ފިއުލް ސަޕްލައި ޝެޑްތަކުން ވިއްކާ ރޭޓުގައި މަސްވެރިންނާއި އާންމު ރައްޔިތުންނަށް ތެޔޮ ފޯރުކޮށްދިނުން ކަމަށް ޝިމާދު ވިދާޅުވިއެވެ. މި މަޝްރޫޢު ފެށުމުގެ ކުރިން ހެދުނު ދިރާސާއިން ދައްކާގޮތުން އެންމެ ގިނައިން މަސްވެރިން ހަރަކާތްތެރިވަނީ މާލެ ސަރަހައްދުގައި ކަމަށްވާތީ، މިއަހަރުގެ ޖޫން މަހުގެ ތެރޭގައި ހުޅުމާލޭގެ ފިއުލް ސަޕްލައި ޝެޑުން މަސްވެރިންނަށް އެސްޓީއޯގެ ރޭޓުން ތެޔޮ ވިއްކަން ފަށާފައިވާނެއެވެ.
މަސްވެރިންނަށް ފަސޭހަކަމާއެކު ތެޔޮ ލިބޭނެ އިންތިޒާމް ހަމަޖެއްސުމަށް ސަރުކާރުން ކުރާ މަސައްކަތުގެ ދަށުން ރާއްޖޭގެ ހުރިހާ އަތޮޅެއްގައި ތެޔޮ ރައްކާކުރާ "ސްކިޑް" ޤާއިމްކުރުމުގެ މަޝްރޫޢު އިއްޔެ ވަނީ އިފްތިތާހްކޮށްފައެވެ.
