ހުޅުމާލޭ ހިޔާ ފްލެޓުގެ އެޗް-9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައި ގޭންގަކުން ދިވެއްސަކު ރަހީނުކޮށްގެން އުޅުނު މައްސަލައިގައި، ފުލުހުން ހިންގި އޮޕަރޭޝަނެއްގައި އެމީހާ ސަލާމަތްކޮށް، އެ މައްސަލައިގައި 12 ފިރިހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން އެ ސަރަހައްދުގައި ހަރަކާތްތެރިވި ނޫސްވެރިންނަށް މައުލޫމާތު ދިން ގޮތުގައި، ރަހީނުކުރި މީހުން އުޅެފައިވަނީ އެމީހާގެ އިނގިލި ބުރިކޮށްލާށެވެ.
މި މައްސަލައާ ގުޅޭގޮތުން ބައެއް މީޑިއާތަކަށް މައުލޫމާތު ދެމުން ހޯމްލޭންޑް އެންޑް ސެކިއުރިޓީ މިނިސްޓަރު އަލީ އިހުސާން ވިދާޅުވި ގޮތުގައި، ރޭ އިރާކޮޅު ފުލުހުންނަށް ލިބުނު އިންޓެލިޖެންސް މައުލޫމާތަކާ ގުޅިގެން ހިންގި އޮޕަރޭޝަނުގައި ރަހީނުކުރި ދިވެއްސަކު ވަނީ ސަލާމަތް ކޮށްފައެވެ. އަދި އެ އޮޕަރޭޝަންގައި ފުލުހުން ދެއްކި ހުޝިޔާރުކަމަށް މިނިސްޓަރު ވަނީ ޝުކުރު އަދާކުރައްވާފައެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ މި މައްސަލަ ތަހުގީގު ކުރަމުންދާ ކަމުގައެވެ.
