ހެލްތު މިނިސްޓްރީން އިންތިޒާމުކޮށްގެން ދެ ދުވަހަށް ކުރިއަށްގެންދާ ހެލްތު އެކްސްޕޯ ނައިބު ރައީސް ޙުސައިން މުޙައްމަދު ލަޠީފު ހުޅުވާ ދެއްވައިފިއެވެ. މި އެކްސްޕޯއަކީ ދުޅަހެޔޮ މުޖުތަމައެއް ބިނާކުރުމަށް ސިއްހީ ދާއިރާއިން ކުރެވޭ މަސައްކަތްތަކާއި، ސިއްހީ ގޮތުން ދުޅަހެޔޮ އާދަތަކަށް އާންމުން ހޭލުންތެރިކުރުމުގެ މަޢުލޫމާތު ފޯރުކޮށްދިނުމަށް ހެލްތު މިނިސްޓްރީން އިންތިޒާމުކޮށްގެން ދެ ދުވަހަށް ކުރިއަށްގެންދާ ހަރަކާތެކެވެ.
އެކްސްޕޯ ހުޅުވުމުގެ ރަސްމިއްޔާތުގައި ނައިބު ރައީސް ވަނީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ސިއްހީ ދާއިރާއިން ކުރެވުނު މަސައްކަތްތަކުގެ ވަނަވަރު ހިމެނޭ "ހަފުތާ 52″ އާންމުކޮށްދެއްވާފައެވެ. އަދި އެކްސްޕޯގައި ހުރި އެކިއެކި ސްޓޯލްތަކަށް ޒިޔާރަތްކުރައްވައި ބައްލަވާލައްވާފައިވެއެވެ.
މި އެކްސްޕޯގައި މާލެ ސަރަހައްދުގެ ހޮސްޕިޓަލްތަކާއި، ކްލިނިކްތަކާއި އަދި ޖަމިއްޔާ ޖަމާއަތްތައް ހިމެނޭ ގޮތަށް 50 ސްޓޯލް ގާއިމުކޮށް، އާންމުންނަށް މައުލޫމާތު ލިބޭނެ އިންތިޒާމު ހަމަޖައްސާފައިވެއެވެ. މިއަދު ހަވީރު 4:00 އިން 11:00 އަށް ކުރިއަށްދާ މި އެކްސްޕޯގައި ކުޑަކުދިންނަށް ޚާއްސަ ހަރަކާތްތަކެއްވެސް ހިމެނެއެވެ.
އޭގެ ތެރޭގައި ކުޑަކުދިންގެ ހެލްތު ޗެކަޕާއި، މިންހެޔޮ ކާނާއާއި، ހެދިބޮޑުވުމާއި، ވެކްސިންއާ ގުޅޭ މައުލޫމާތުގެ އިތުރުން އެހެނިހެން ސިއްހީ މައުލޫމާތު ހިމެނެއެވެ.
