ހުޅުމާލޭ ހިޔާ ޓަވަރުގައި މީހަކު ރަހީނުކޮށްފައިވާކަމުގެ މައުލޫމާތު ލިބުމާ ގުޅިގެން ފުލުހުން ރޭ ހިންގި ހާއްސަ އޮޕަރޭޝަނެއްގައި އެފަދަ ނުރައްކާތެރި ހާދިސާއެއް ހިނގަން އުޅެނިކޮށް ހުއްޓުވާ، އަނިޔާ ލިބެމުންދިޔަ މީހާ ސަލާމަތްކޮށްފައެވެ.
ފުލުހުންނަށް މައުލޫމާތު ލިބުމާއެކު ވަގުތުން އެޓެންޑްވެ، ހިޔާގެ ނުވަވަނަ ޓަވަރުގައި ހުރި އެޕާޓްމަންޓެއް ދެނެގަތުމަށްފަހު، ދޮރުވައްޓާލައިގެން ވަދެ، އެތަނުގައި ރަހީނުކޮށްފައި ހުރި މީހާވަނީ ސަލާމަތް ކޮށްފައެވެ. އޭރު އެމީހާގެ ބޮލުގެ އިސްތަށި ވަނީ ބާލާފައެވެ.
ރަހީނު ކުރެވުނު މީހާއާއި ހަވާލާދީ ފުލުހުން ބުނެފައިވަނީ ފުލުހުންނަށް އެޕާޓްމަންޓަށް ވަދެވުނުއިރު، ރަހީނުކުރި މީހުން ދިޔައީ އޭނާގެ އިނގިލި ބުރިކޮށްލަން ތައްޔާރު ވަމުންނެވެ.
މި މައްސަލައިގައި ދެ ގްރޫޕަކަށް ނިސްބަތްވާ 12 މީހަކު ވަނީ ހައްޔަރުކޮށްފައެވެ. އަދި އެމީހުން ތިބި ތަނަކީ މަސްތުވާތަކެތީގެ ވިޔަފާރިކުރުމަށް ބޭނުންކުރާ އައްޑާއެއް ކަމަށް ފުލުހުން ބުނެފައިވެއެވެ.
ނަމަވެސް މިކަމާ ގުޅޭ އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
