އަންނަ އަހަރު ބޭންކުގެ ޑިޖިޓަލް ހިދުމަތްތައް އިތުރަށް ތަރައްގީ ކުރެވޭނެކަމަށް ބީއެމްއެލްގެ ސީއީއޯ މުހައްމަދު ޝަރީފު މިއަދު ވިދާޅުވެއްޖެއެވެ.
ރައީސް އޮފީހުގައި ބޭއްވުނު ރަސްމިއްޔާތެއްގައި ވާހަކަ ދައްކަވަމުން ޝަރީފް ވިދާޅުވީ މޮބައިލް އެޕް، އިންޓަނެޓް ބޭންކިން އަދި ޕޭމެންޓް ގޭޓްވޭ ފަދަ ހިދުމަތްތައް ފައިނޭންޝަލް ޓެކްނޮލޮޖީގެ އާ ކުރިއެރުންތަކާ އެއްގޮތަށް އަންނަ އަހަރު އަޕްޑޭޓް ކުރެވޭނެ ކަމަށެވެ.
އިތުރު ޑިޖިޓަލް ހިދުމަތްތައް ތަޢާރަފު ކުރުމުގެ އިތުރުން، އޭއައި އަދި ރޮބޮޓިކް ޕްރޮސެސް އޮޓޮމޭޝަން ބޭނުންކޮށްގެން މަސައްކަތްތައް ހަލުވިކޮށް، ކަސްޓަމަރުންނަށް ދެވޭ ހިދުމަތުގެ ފެންވަރު ރަނގަޅު ކުރެވޭނެ ކަމަށް ޝަރީފު ވިދާޅުވިއެވެ. މި ހުރިހާ ކުރިއެރުމެއް ބީއެމްއެލް އިސްލާމިކްއަށްވެސް ލިބިގެންދާނެ ކަން އޭނާ ފާހަގަކުރެއްވިއެވެ.
ހުރިހާ ރަށެއްގައި އޭޓީއެމް ބެހެއްޓުމުގެ މަޝްރޫޢުއަކީ ކުރީގެ ސަރުކާރުގައިވެސް ކުރިއަށް ގެންދަން މަސައްކަތް ކުރެވުނު ކަމެކެވެ. ނަމަވެސް ބޭންކުން އަމިއްލައަށް އިންވެސްޓްކޮށްގެން މި މަޝްރޫޢު ކުރިއަށް ގެންދިއުމަކީ ދެކޮޅުޖެހޭ ކަމަކަށް ނުވާތީ، މިފަހަރު މި މަޝްރޫޢު ކުރިއަށްދަނީ ސަރުކާރުގެ އިންވެސްޓްމަންޓާ އެކުގައެވެ. 2025 ވަނަ އަހަރު ނިމުމުގެ ކުރިން މި މަޝްރޫޢު ނިންމުމަށް ވަރަށް ބުރަ މަސައްކަތްތަކެއް ކުރަންޖެހޭނެ ކަމަށް ޝަރީފު ވިދާޅުވިއެވެ.
ބީއެމްއެލްއަކީ ހުރިހާ ދިވެހިންގެ ބޭންކެއްކަން ފާހަގަކުރައްވަމުން، ޝަރީފު ވިދާޅުވީ މި މަޝްރޫޢުއަކީ ހަމައެކަނި ބޭންކުގެ ހިދުމަތް ފުޅާކުރުމަށްވުރެ މާ ބޮޑު މަސައްކަތެއް ކަމަށެވެ. މިއީ ރައްޔިތުންގެ އުންމީދުތަކަށް އެހީތެރިވެ، މާލީ ބައިވެރިވުން އިތުރުކޮށް، ފާގަތި ދިވެހިރާއްޖެއެއް ބިނާކުރުމަށް ސަރުކާރުން ކުރާ މަސައްކަތުގައި ބީއެމްއެލްއިން އަމަލީގޮތުން ބައިވެރިވާކަމުގެ ހެއްކެއްކަމުގައި އޭނާ ވިދާޅުވިއެވެ.
