އެމްޑީޕީ ސަރުކާރުގެ ދައުރުގައި ޤާއިމްކުރެވުނު ސެޓްލްމަންޓް ކޮމިޓީން އެކިއެކި ފަރާތްތަކަށް ބަދަލުގެ ގޮތުގައި ދޫކޮށްފައިވާ މުދަލާއި ފައިސާގެ އޮޑިޓެއް ހެދުމަށް މިއަދު މާލިއްޔަތު ކޮމިޓީން ނިންމައިފިއެވެ.
މިކަން އޮޑިޓަރ ޖެނެރަލްގެ އޮފީހާ ހަވާލުކުރުމަށް ހުށަހެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާއެވެ. ވަކިވަކި މައްސަލަތައް ކޮމިޓީން ބެލުމުގެ ބަދަލުގައި، ބަދަލު ދެވިފައިވާ އެންމެހައި ގޮތްތައް އޮޑިޓަރ ޖެނެރަލް ބައްލަވައި ކޮމިޓީއަށް ހުށަހެޅުއްވުމަށް އެދިވަޑައިގަތެވެ.
މި މައްސަލަ މާލިއްޔަތު ކޮމިޓީން ބަލަން ފެށީ މިދިޔަ އޮކްޓޯބަރު މަހުގައެވެ. ބަންޑާރަ ނައިބު އަޙްމަދު އުޝާމް ވިދާޅުވެފައިވަނީ، ސެޓްލްމަންޓް ކޮމިޓީން ބަދަލު ދިނުމުގެ މަސައްކަތް ކުރިއަށް ގެންގޮސްފައިވަނީ، އެމްޑީޕީގެ އަޣުލަބިއްޔަތު އޮތް ކުރީގެ މާލިއްޔަތު ކޮމިޓީގެ ނިންމުމަކަށް ހަވާލާދީކަން، ވަކިވަކި މައްސަލަތައް ބެލުމުން ފާހަގަކުރެވިފައިވާ ކަމަށެވެ.
2022 ވަނަ އަހަރު މާލިއްޔަތު ކޮމިޓީން ވަނީ ބަދަލު ދިނުމުގެ ކަންކަން ކަނޑައެޅިފައިވާ އުސޫލެއްގެ ދަށުން ކުރިއަށް ގެންދިއުމަށް ލަފާދީފައެވެ. ނަމަވެސް، މާލިއްޔަތު ކޮމިޓީގެ މެންބަރުން އެއްބަސްވާ ގޮތުގައި، އެމްޑީޕީ ސަރުކާރުން ގާނޫނާއި ގަވާއިދާ ޚިލާފަށް ބަދަލު ދީފައިވާ ކަމަށް ބެލެވޭނެ ޖާގަ އެބައޮތެވެ.
ރައީސް މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމާއެކު ސެޓްލްމަންޓް ކޮމިޓީ އުވާލެއްވިއެވެ. ބަންޑާރަ ނައިބުގެ އޮފީހުން ބުނެފައިވާ ގޮތުގައި، އެމްޑީޕީ ސަރުކާރުން ގިނަ މައްސަލަތަކުގައި ބަދަލު ދީފައިވަނީ ގާނޫނާ ޚިލާފަށެވެ. މިކަން ބެލުމަށް ޚާއްސަ ޓީމެއް އެކުލަވާލައި، އެ މައްސަލަތައް ދިރާސާކުރުމުގެ މަސައްކަތް ވަނީ ފަށާފައެވެ. އަދި ގާނޫނާ ޚިލާފަށް ބަދަލު ދީފައިވާ އެއްބަސްވުންތައް ބާޠިލުކުރުމަށްވެސް ވަނީ ނިންމާފައެވެ.
ވެރިކަން ބަދަލުވުމުގެ ދެތިން ދުވަސް ކުރިން، ކޮމިޓީއަށް ހުށަހެޅުމަކާ ނުލައި، ސަތޭކަ މިލިއަނުން ގުނާ އަދަދެއްގެ ދައުލަތުގެ މުދަލާއި ރަށްތަކާއި ފަޅުތައް އެމްޑީޕީ ސަރުކާރުން އެކި ފަރާތްތަކަށް ދީފައިވާކަން ވަނީ ހާމަވެފައެވެ. މީގެއިތުރުން، މިދިޔަ އަހަރުގެ ނޮވެމްބަރު މަހު ކޮމިޓީ އުވާލުމަށްފަހު، ބަދަލު ދޭން ނިންމާފައިވާ 10 ސެޓްލްމަންޓެއްގެ މައްޗަށް ޢަމަލުކުރުން އެޓަރނީ ޖެނެރަލްގެ އޮފީހުން ވަނީ ހުއްޓުވާފައެވެ.
