ދިވެހިރާއްޖޭގެ 20 އަހަރުގެ ޤައުމީ ތަރައްޤީގެ ޕްލޭން އެކުލަވާލުމުގެ މަޝްވަރާތައް ފެށުމުގެ ރަސްމިއްޔާތުގައި، ކޮންމެ ރަށަކުންވެސް މި ޕްލޭނަށް ބަސް ބުނުން ރައީސުލްޖުމްހޫރިއްޔާ ޑރ. މުހައްމަދު އެދިވަޑައިގެންފިއެވެ.
އެމަނިކުފާނު ވިދާޅުވެފައިވަނީ، ސިޔާސީ އޮއިވަރެއްގައި ޤައުމުގެ ތަރައްޤީގެ ކަންކަމަށް އަބަދު ބަދަލު އަންނަނަމަ، އޭގެ ފައިދާ ރައްޔިތުންނަކަށް ނުކުރާނެކަމަށެވެ. އެހެންކަމުން، މި މަސައްކަތަކީ ޤާނޫނީ ބާރުވެރިކަން ލިބިގެން ކުރެވޭ އަދި ޤާނޫނު އަސާސީގެ ތެރެއިންވެސް ބަލައިގަނެވޭ މަސައްކަތަކަށް ހައްދަވާނެކަމަށް ވިދާޅުވެފައިވެއެވެ.
ރައީސް މުޢިއްޒު އިތުރަށް ވިދާޅުވެފައިވަނީ، މި މަސައްކަތަކީ ސިޔާސީ ވިސްނުން ދޫކޮށް، ޤައުމީ މަސައްކަތެއްގެ ގޮތުގައި ބަލައިގަނެވެންޖެހޭ އެއްޗެއްކަމަށާއި، ހުރިހާ ރަށެއްގެ ރައްޔިތުންގެ ޚިޔާލު މި ޕްލޭނުގައި ހިމެނެންޖެހޭނެކަމަށެވެ. އަދި 20 އަހަރަކީ ޖީލެއްކަން ފާހަގަކުރައްވައި، މި މަސައްކަތް ނިމޭއިރު ޖީލެއްގެ ތަޞައްވުރު އެނގިގެންދާނެކަމަށްވެސް ވިދާޅުވެފައިވެއެވެ.
ރައީސުލްޖުމްހޫރިއްޔާ ވަނީ، މި ޕްލޭން އެކުލަވާލާއިރު ދުނިޔެއަށް އަންނަ ބަދަލުތަކަށް ރިޢާޔަތްކުރަންޖެހޭކަމަށާއި، އެހެންކަމުން މިއީ އޭއައި ބޭނުންކުރެވިގެން އެކުލަވާލެވޭ ޕްލޭނަކަށް ވާންޖެހޭނެކަމަށް ވިދާޅުވެފައެވެ. އަދި ޤައުމުގެ ތަރައްޤީގައި ފަންނިއްޔާތު ހިމަނަންޖެހޭކަންވެސް ފާހަގަކުރައްވާފައިވެއެވެ.
ޤައުމީ ތަރައްޤީގެ މާސްޓަރ ޕްލޭންގެ މަސައްކަތް އެއް އަހަރު ދުވަހުގެ ތެރޭގައި ނިންމަވާނެކަމަށް ރައީސް ވިދާޅުވެފައިވާއިރު، އަންނަ އަހަރުގެ ނޮވެމްބަރު މަހު މި ޕްލޭން ތަންފީޒުވެގެންދާނެކަމަށް އުންމީދުކުރައްވާކަމަށްވެސް ވިދާޅުވެފައިވެއެވެ. އަދި މި ޕްލޭނާއެކު ރާއްޖޭގައި ހުރި ބޮޑެތި މައްސަލަތަކަށް ރިޢާޔަތްކޮށް، ދުރު ރާސްތާގައި އެކަންކަން ހައްލުކުރުމަށް ގިނަ ފިޔަވަޅުތަކެއް އަޅުއްވާނެކަމަށްވެސް ވިދާޅުވެފައިވެއެވެ.
