ކުރިއަށް އޮތް 20 އަހަރުގެ ޤައުމީ ތަރައްޤީގެ ޕްލޭން ނުވަތަ ޖީލުގެ ޤައުމީ ތަރައްޤީގެ ތަޞައްވަރު އެކުލަވާލުމުގެ މަޝްވަރާތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަދު ފައްޓަވައިދެއްވާއިފިއެވެ. މި ޕްލޭން އެކުލަވާލުމުގެ މަސައްކަތް ފެށުމަށް ވަޒީރުންގެ މަޖިލީހުން ނިންމާފައިވާކަން ރައީސުލްޖުމްހޫރިއްޔާ އިޢުލާނު ކުރެއްވީ ސެޕްޓެމްބަރ 17 ވަނަ ދުވަހުއެވެ.
މި ޕްލޭނަކީ ކުރިއަށް އޮތް 20 އަހަރު ރާއްޖެ ތަރައްޤީވެގެން އަންނާނެ ގޮތް ހިމެނޭ، ޤާނޫނީ ބާރުވެރިކަން ލިބިގެންވާ ޕްލޭނެއްކަމަށް ރައީސް މުޢިއްޒު ވިދާޅުވެފައިވެއެވެ. އަދި މިފަދަ ޕްލޭނެއްގެ އެންމެ ބޮޑު ބޭނުމަކީ ރައްޔިތުންގެ ޚިޔާލާއި ނިންމުންތަކާއެކު ރާއްޖޭގެ ތަރައްޤީއާ ގުޅޭ ދިގުމުއްދަތުގެ ޕްލޭނެއް އޮތުންކަމުގައި ފާހަގަކުރައްވާފައިވެއެވެ.
ޤައުމީ ތަރައްޤީގެ ޕްލޭން އެކުލަވާލުމުގައި، ހުރިހާ ރަށްތަކާއި، ޖަމިއްޔާ ޖަމާޢަތްތަކާއި، ސިޔާސީ ޕާޓީތަކާއި އަދި އެކި ދާއިރާތަކުގެ މާހިރުންގެ ލަފާ ހޯދާނެކަމަށް ރައީސް ވިދާޅުވެފައިވެއެވެ. މީގެ އިތުރުން، އެކި ސިނާޢަތްތަކަށް އަމާޒުކޮށް މަޝްވަރާއާއި ޚިޔާލު ހޯދައި، ރާއްޖެއިން ބޭރުގެ ކުރިއަރާފައިވާ ޤައުމުތަކުގެ ތަޖުރިބާވެސް ހޯދާނެކަމަށް ވިދާޅުވެފައިވެއެވެ.
ރައީސް މުޢިއްޒު އިތުރަށް ފާހަގަކުރައްވާފައިވަނީ، މި ޕްލޭނަކީ ޤައުމިއްޔަތުގެ ވިސްނުމުގައި ޤައުމުގެ ކުރިމަގު ހިމާޔަތްކޮށް، ބިނާކުރުމުގެ ވިސްނުމުގައި ކުރެވޭ މަސައްކަތަކަށް ވެގެންދާނެކަމަށެވެ. އަދި މި މަސައްކަތަކީ އެންމެންގެ ކުރިއެރުމަށާއި، ދަރިންގެ މުސްތަޤްބަލަށް ކުރެވޭ ވަރަށް މުހިންމު މަސައްކަތެއްގެ ގޮތުގައި ފާހަގަކުރައްވާފައިވެއެވެ. އަދި މި ޕްލޭނާއެކު، ރާއްޖޭގައި ދިމާވެފައިވާ ބޮޑެތި މައްސަލަތަކަށް ރިޢާޔަތްކޮށް، ދުރު ރާސްތާގައި އެކަންކަން ޙައްލުކުރުމަށް ގިނަ ފިޔަވަޅުތަކެއް އަޅާނެކަމަށްވެސް ވިދާޅުވެފައިވެއެވެ.
