އަރަބިއްޔާ ސްކޫލުގެ އާ އިމާރާތުގެ މަޝްރޫއު ލަސްވެފައިވަނީ މަޝްރޫއުގެ އަގަށްވުރެ 80 މިލިއަން ރުފިޔާ އިތުރަށް ހޭދަކުރަން ޖެހޭތީ، އެ ފައިސާ ސަލާމަތްކުރުމަށް ކަމުގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.
މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ޝަފީއު ވިދާޅުވީ މަޝްރޫއުގެ ސްކޯޕަށް އައި ބަދަލާއެކު، ޒަމާނީ ވަސީލަތްތަކާއެކު އަރަބިއްޔާގެ އާ އިމާރާތް އެޅުމާ ގުޅޭގޮތުން ކޮންޓްރެކްޓަރާއެކު މަޝްވަރާކުރެވުނު ނަމަވެސް، ހުށަހެޅި އަގުތައް މާބޮޑުވެފައިވާ ކަމަށެވެ.
މިނިސްޓަރު އިތުރަށް ވިދާޅުވީ ސަރުކާރުގެ ފުރަތަމަ 100 ދުވަހުގެ ތެރޭގައި މަސައްކަތް ފެށުމަށް މަސައްކަތްކުރި ނަމަވެސް، ރައްޔިތުންގެ ފައިސާއިން 80 މިލިއަން ރުފިޔާ އިތުރަށް ހޭދަކުރަންޖެހޭތީ އެކަން ލަސްކުރުމަށް ނިންމި ކަމަށެވެ. އަދި މިވަގުތު އަރަބިއްޔާގެ ދަރިވަރުން ކިޔަވަމުންދާ އިމާރާތުގައި އިންސާނީ ހައްގުތަކާއި ތައުލީމީ ގޮތުން މާބޮޑު ގެއްލުމެއް ނެތް ކަމަށާއި، ބެލެނިވެރިންނާއި ޕީޓީއޭއާވެސް މިކަން ހިއްސާކޮށްފައިވާ ކަމަށް ވިދާޅުވިއެވެ.
އަރަބިއްޔާ ސްކޫލުގެ އާ އިމާރާތުގެ މަސައްކަތުގެ އެއްބަސްވުން ބާތިލުކޮށްފައިވަނީ މި އަހަރުގެ ސެޕްޓެމްބަރު މަހުގައެވެ. ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުން އަރަބިއްޔާ ސްކޫލުގެ އާ އިމާރާތް އެޅުމަށް ނިންމާފައި އޮތީ ބާޖަމާލުއްދީން ސްކޫލު ހިންގި ބިމުގައެވެ. އެގޮތުން 2022 ވަނަ އަހަރުގެ ސެޕްޓެމްބަރު މަހު އަމީން ކޮންސްޓްރަކްޝަނާ މަސައްކަތް ހަވާލުކުރެވުނެވެ. ނަމަވެސް ރައީސް ޑރ. މުހައްމަދު މުއިއްޒުގެ ސަރުކާރުން ވަނީ މާލޭގެ ކުރީގެ ކުނިކޮށި ހިންގި ބިމުގައި އަރަބިއްޔާގެ އާ އިމާރާތް އެޅުމަށް ނިންމައި، މި އަހަރުގެ ފެބްރުއަރީ 24 ވަނަ ދުވަހު އިމާރާތުގެ ބިންގާ އަޅައިފައެވެ.
