މިދިޔަ ބުދަ ދުވަހުގެ ރޭ ބޭއްވި ނޫސްވެރިކަމުގެ 11 ވަނަ އެވޯޑު ހަފްލާގައި އެއްވެސް ބައިވެރިވުމެއް އޭނާގެ ނޯންނާނެ ކަމަށް މޯލްޑިވްސް މީޑިއާ ކައުންސިލްގެ ރައީސް އަޙްމަދު މުސްޠަފާ މިއަދު ނެރުއްވި ބަޔާނެއްގައި ވިދާޅުވެއްޖެއެވެ. މިކަން މީޑިއާ ކައުންސިލްގެ މެންބަރުންނަށް އެނގިވަޑައިގަންނަވާނެ ކަމަށާއި، ނޫސްވެރިކަމުގެ އެވޯޑު ދޭން ފެށުނު އިރުވެސް ކައުންސިލްގެ ރައީސްގެ އެއްވެސް އަތެއް އެކަމުގައި ނެތްކަމަށް މުސްޠަފާ ވަނީ ފާހަގަކުރައްވާފައެވެ.
އެވޯޑުތަކުގެ ނޮމިނޭޝަނާ ގުޅޭ އެންމެހާ ކަންކަން ކުރިއަށް ގެންދިޔައީ ކައުންސިލް މެންބަރު އަލީ ނިޝާނާއި އިނާމު ކޮމިޓީގެ ނައިބު މުޤައްރިރުގެ ބެލުމުގެ ދަށުންކަމަށާއި، އެވޯޑަށް ނޮމިނޭޓުވި ނޫސްވެރިންގެ ކޮންޓެންޓާއި ގްރެފިކްސް ހެދުންވެސް ކުރިއަށް ގެންގޮސްފައިވަނީ ސީދާ ނިޝާންގެ ބެލުމުގެ ދަށުންކަމަށް މުސްޠަފާ ވިދާޅުވިއެވެ. އަދި މިކަމާ ގުޅޭ އެއްވެސް މަޢުލޫމާތެއް ކައުންސިލްގެ މެންބަރަކަށް ނުވަތަ ރައީސްގެ ހައިސިއްޔަތުން އޭނާއަށް ލިބިފައިނުވާކަމަށްވެސް ވިދާޅުވިއެވެ.
މުސްޠަފާ އިތުރަށް ފާހަގަކުރެއްވި ގޮތުގައި އަދަދު ނޫހުގެ "ސްކީލާން" ޑޮކިއުމެންޓްރީއަކީ ދިވެހި މީޑިއާގެ އަޚްލާޤީ މިންގަނޑާ ޚިލާފު ކޮންޓެންޓެއްކަން މިދިޔަ އަހަރު މީޑިއާ ކައުންސިލުން ނެރުނު ބަޔާނެއްގައި ފާހަގަކޮށްފައިވާއިރު، އެވޯޑު ހަފްލާގައި މި ކޮންޓެންޓު ކައުންސިލްގެ ރައީސަށާއި ޕީއެސްއެމްއަށް ނޭނގި ދެއްކުމުގެ ޒިންމާ އުފުލަންޖެހޭނީ އެވޯޑުގެ ކަންކަން އިންތިޒާމުކުރި ކައުންސިލްގެ މެންބަރުންކަމަށް ވިދާޅުވެފައިވެއެވެ.
މި ބަޔާން ނެރުއްވާފައިވަނީ، މި މައްސަލައާ ގުޅިގެން ޕީއެސްއެމްއިން އޭނާ ވަޒީފާއިން ވަކިކުރުމަށްފަހު، 24 ގަޑިއިރު ނުވަނީސް އަލުން ވަޒީފާ އިޢާދަކޮށްދިނުމާ ގުޅިގެންނެވެ.
