ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖަރ އޮޕަރޭޝަންސް ނިއުސް އެންޑް ކަރަންޓް އެފެއާޒްގެ މަޤާމުން ވަކިކޮށްފައިވާ މޯލްޑިވްސް މީޑިއާ ކައުންސިލު (އެމްއެމްސީ) ގެ ރައީސް އަޙްމަދު މުސްޠަފާގެ ވަޒީފާ ވަނީ އަލުން އިއާދަކޮށްފައެވެ.
މުސްޠަފާގެ ވަޒީފާއިން ވަކިކުރީ މީޑިއާ ކައުންސިލްގެ 11 ވަނަ ނޫސްވެރިކަމުގެ އެވޯޑް ހަފްލާގައި ޕީއެސްއެމްގެ އެޑިޓޯރިއަލް ކޮންޓެންޓާއި ނޫސްވެރިކަމުގެ އާންމު މިންގަނޑުތަކާ ޚިލާފު ވީޑިއޯއެއް ދެއްކުމާ ގުޅިގެންނެވެ. ނަމަވެސް މި މައްސަލަ ޕީއެސްއެމްގެ ޑިރެކްޓަރުންގެ ބޯޑުން ބެލުމަށްފަހު، ގާތްގަނޑަކަށް 23 ގަޑިއިރުގެ ތެރޭގައި މުސްޠަފާގެ ވަޒީފާ ވަނީ އަނބުރާ ރުޖޫއަކޮށްދީފައެވެ.
މި މައްސަލައިގައި މީޑިއާ ކައުންސިލްގެ ރައީސްގެ ހައިސިއްޔަތުން މުސްޠަފާ ވަނީ ބަޔާނެއް ނެރުއްވާފައެވެ. އެ ބަޔާނުގައި ވިދާޅުވެފައިވަނީ އެވޯޑް ހަފްލާގެ އެއްވެސް ކަމެއްގައި އޭނާގެ ސީދާ ބައިވެރިވުމެއް ނެތް ކަމަށެވެ. އަދި ކައުންސިލްގެ މެންބަރު ޢަލީ ނިޝާން ކުރެއްވި ތުހުމަތުތައް ދޮގުކުރައްވަމުން، ހަފްލާގައި ދެއްކި ވީޑިއޯއަކީ އަދަދު ނޫހުން ތައްޔާރުކުރި އަޚްލާޤީ މިންގަނޑާ ޚިލާފު އެއްޗެއްކަމަށް މީޑިއާ ކައުންސިލުން 2023 ސެޕްޓެންބަރު 28 ގައި ބަޔާނެއް ނެރެފައިވާ އެއްޗެއްކަމަށް ވިދާޅުވިއެވެ.
މުސްޠަފާ އިތުރަށް ވިދާޅުވެފައިވަނީ މި ކޮންޓެންޓު ހަފްލާގައި ދެއްކުމުގައި، ކައުންސިލްގެ ރައީސަށާއި ޕީއެސްއެމްއަށް ނޭނގި ގަސްތުގައި އެކަން ކުރުމުގައި، އެވޯޑުގެ ކަންކަން އިންތިޒާމުކުރި ކައުންސިލް މެންބަރުންގެ ޒިންމާ އޮތްކަމަށެވެ.
