މާލެއާއި ފުށިދިއްގަރުފަޅުގައި ތަރައްޤީކުރާ ރަސްމާލެއާ ދެމެދު ކަނޑު އަޑީގެ ޓަނަލެއް އެޅުމުގެ ވިސްނުމަކީ ރައީސް މުއިއްޒުގެ ހިޔާލީ ފޮލާއެއް ކަމުގައި ކުރީގެ ރައީސް އަބްދުﷲ ޔާމީން ވިދާޅުވެފައިވެއްޖެއެވެ. ޔާމިން މިހެން ވިދާޅުވީ ޕީއެންއެފުން ރޭ ބޭއްވި ފްރޮންޓް އޮފީހުގެ ޖަލްސާގައެވެ.
ދާދިފަހުން ކޮންސްޓްރަކްޝަން މިނިސްޓަރު މުއްތަލިބު ވިދާޅުވެފައިވަނީ، މިއީ ވަރަށް އާދަޔާ ޚިލާފު ތަސައްވުރެއް ކަމަށާއި، ވަގުތު ނަގާނެ މަސައްކަތަކަށްވެފައި، ޓައިމްލައިނެއް ކަނޑައަޅައިގެން ކުރެވޭނެ ކަމެއް ނޫން ކަމަށެވެ. މުއްތަލިބު އިތުރަށް މިސާލެއްގެ ގޮތުން ވިދާޅުވީ، އެމެރިކާއިން ހަނދަށް ދިއުމުގެ ކުރިން ޖޯން އެފް ކެނެޑީގެ ވިޝަނަކީވެސް އެކަން ކުރެވޭނެކަމުގެ ތަސައްވުރެއް ކަމަށާއި، ލީޑަރެއްގެ ޚާއްޞަ ސިފައަކީ މިފަދަ ކަންކަން އެންވިޝަން ކުރަން އެނގި، އެކަން ކުރަން ކެރުން ކަމަށެވެ.
ނަމަވެސް ޔާމީން ވިދާޅުވީ އެހެން މީހުންގެ ވިޝަނަކީ ކުރެވޭވަރުގެ ކަންކަމާމެދު އޮންނަ ތަސައްވުރަކާއި އުއްމީދެއް ކަމަށާއި، ރައީސް މުއިއްޒުގެ މި ވިސްނުމަކީ ރަމަޟާން މަހު އަރާނެ ފޮނި ބައިސްކަލެއްގެ ވާހަކަ ފަދަ ހިޔާލީ ފޮލާއެއް ކަމަށެވެ.
އަދި މިއީ ރައްޔިތުންގެ ބޮލަށް ކޮންމެ އެއްޗެއްވެސް ވެއްދިދާނެ ކަމަށް ދެކިގެން ދައްކާ ވާހަކައެއް ކަމަށާއި، އެއްވެސް އިރެއްގައި މިކަން ކުރުމުގެ ނިޔަތެއް ނެތް ކަމަށެވެ. އިތުރަށް ވިދާޅުވީ، ފަންނީ މީހުންނާއެކު މަޝްވަރާކުރަމުންދާ ކަމަށް ރައީސް މުއިއްޒު ވިދާޅުވި ވިދާޅުވުމަކީވެސް އިތުރުފުޅެއް ކަމަށާއި، މިކަން މިނިސްޓަރު މުއްތަލިބުގެ ވާހަކަފުޅުންވެސް ސާފުވާ ކަމަށެވެ.
