އަމިއްލަ ދަރިއެއްގެ އެކައުންޓަށް އެކި ފަހަރުމަތިން މިލިއަން ރުފިޔާއަށް ވުރެ ގިނަ އަދަދެއްގެ ފައިސާ ޖަމާކުރައްވާފައިވާ މައްސަލާގައި، ޕީއެސްއެމްގެ ކުރީގެ ފައިނޭންސް ޑިރެކްޓަރު ހަނީފުގެ ޕާސްޕޯޓު ހިފަހައްޓަން ކުރިމިނަލް ކޯޓުން އަމުރު ކޮށްފިއެވެ.
އޮޑިޓަރ ޖެނެރަލްގެ އޮފީހުން ނެރެފައިވާ އޮޑިޓް ރިޕޯޓެއްގައި ހާމަވެފައިވާ ގޮތުގައި ޕީއެސްއެމްގެ ކުރީގެ ފައިނޭންސް ޑިރެކްޓަރު އަޙްމަދު ހަނީފު ވަނީ އޭނާގެ އަމިއްލަ ދަރިއެއްގެ އެކައުންޓަށް އެކި ފަހަރުމަތިން މިލިއަން ރުފިޔާއަށް ވުރެ ގިނަ އަދަދެއްގެ ފައިސާ ޖަމާ ކޮށްފައެވެ.
މިދިޔަ މަހު އާންމުކުރި އޮޑިޓް ރިޕޯޓުގައި ފާހަގަކޮށްފައިވާ ގޮތުގައި ޕީއެސްއެމުން ޑޮލަރު ގަތުމަށް އަމިއްލަ ފަރާތްތަކަށް ގިނަ އަދަދެއްގެ ފައިސާ ދިނުމަށްފަހު، އޭގެ ތެރެއިން ބައެއް ފައިސާއަށްވާ ޑޮލަރު ނުލިބި އޮތްކަން ވަނީ ހާމަވެފައެވެ. މި ގޮތުން، 2020 އިން 2024 ގެ އެޕްރީލް މަހުގެ ނިޔަލަށް ޕީއެސްއެމްގެ ބޭންކް އެކައުންޓުން ޑޮލަރު ގަތުމަށް ނަގާފައިވާ 4.6 މިލިއަން ރުފިޔާ ގެއްލިފައިވާ ކަމަށާއި، 2017 އިން 2024 ގެ އެޕްރީލް މަހުގެ ނިޔަލަށް ކުންފުންޏަށް ލިބުނު އާމްދަނީ އާއި އެހެނިހެން ގޮތްގޮތުން ބަލައިގަނެފައިވާ 4.3 މިލިއަން ރުފިޔާ އާއި ތިޖޫރީގައި ބެހެއްޓި 190,000 ރުފިޔާ ވެސް ގެއްލިފައިވާ ކަމަށް ރިޕޯޓުގައި ބަޔާންކޮށްފައިވެއެވެ.
މި މައްސަލައިގެ ތަޙްޤީޤު އޭސީސީން ކުރިއަށް ގެންދާ ކަމަށާއި، އެ އިދާރާގެ އެދުމުގެ މަތިން މިދިޔަ އާދިއްތަ ދުވަހު ވަނީ ހަނީފުގެ ޕާސްޕޯޓު ހިފެހެއްޓުމަށް އަމުރުކޮށްފައިވާ ކަމަށް އޭސީސީގެ މީޑިއާ އޮފިޝަލެއް ވަނީ މަޢުލޫމާތު ދެއްވާފައެވެ.
