މާފުށީ ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމުގައި އެހީތެރިވުމުގެ ތުހުމަތުގައި ކަރެކްޝަނަލް އޮފިސަރުންގެ މައްޗަށް ދައުވާ އުފުލާފައިވާ މައްސަލައިގައި، ކުށަށް އިއުތިރާފުވެ ދައުލަތާއެކު އެއްބަސްވުން ހަދާފައިވާ ދެ މީހަކު މިއަދު އެ އެއްބަސްވުމުން ރުޖޫއަވެއްޖެއެވެ.

މި މައްސަލައިގައި ފުލުހުން 13 އޮފިސަރެއްގެ މައްޗަށް ދައުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވި ނަމަވެސް، ދައުވާ އުފުލާފައިވަނީ ފަސް އޮފިސަރެއްގެ މައްޗަށެވެ. އެއީ އުނގޫފާރު އައިވަރީ ހައުސް ޖިނާހު އަބްދުއްރަހީމް، މާފުށީ ބީޗްހައުސް އަލީ ހިޝާމް، ނޭކުރެންދޫ ތަރާނާގެ އަލީ ނާޒިމް، ވިލިނގިލީ ކުއްޅަވައްގެ މުހައްމަދު ފަތޫހު އަބްދުﷲ އަދި ލަންދޫ ކާމިނީގެ އަލީ އަޝްފާގެވެ.

އެ ފަރާތްތަކުގެ މައްޗަށް ދައުވާކޮށްފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމާއި، މަނީ ލޯންޑްރިންގ އަދި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާތަކެވެ. ޝަރީއަތް ނިމެންދެން ބަންދުކުރުމަށް ކުރިން ނިންމި މި އެންމެން މިހާރު ވަނީ ދޫކޮށްލާފައެވެ.

މައްސަލަ ބައްލަވާ ގާޒީ އިސްމާއިލް ޝަފީއު މިއަދުގެ އަޑުއެހުމުގައި ވިދާޅުވެފައިވަނީ މައްސަލައިގައި ހިމެނޭ އަލީ ނާޒިމް، މުހައްމަދު ފަތޫހު އަބްދުﷲ އަދި އަލީ އަޝްފާގު ދައުލަތާއެކު އިއުތިރާފުގެ އެއްބަސްވުން ހަދާފައިވާ ކަމަށެވެ.

އެކަމާ ގުޅިގެން ވާހަކަދެއްކުމަށް ފުރުސަތު ދެއްވުމުން، އަޝްފާގު އަދި ނާޒިމްގެ ވަކީލު ވިދާޅުވެފައިވަނީ އެ ދެ މީހުން އެއްބަސްވުމުން ރުޖޫއަވާން ބޭނުންވާ ކަމަށެވެ. އޭގެ ސަބަބެއްގެ ގޮތުގައި އެ ދެ މީހުން ފާހަގަކޮށްފައިވަނީ، ތަހުގީގު މަރުހަލާގައި ފުލުހުންނާއި އޭރު އައްޔަންކޮށްފައިވާ ވަކީލުން، އެއްބަސްވުން ހަދައިފިނަމަ ބަންދަށް ލުއިދޭނެ ކަމަށް ބުނެފައިވީ ނަމަވެސް އެފަދަ ލުއިތަކެއް ލިބިފައިނުވާ ކަމަށެވެ.

ދައުލަތުން ބުނެފައިވަނީ އެ ދެ މީހުންނާއެކު އިއުތިރާފުގެ އެއްބަސްވުން ހަދާފައިވަނީ ބައެއް ދައުވާތައް ނުކުރާ ގޮތަށް ކަމަށާއި، އެއްބަސްވުން އުވޭ ހާލަތުގައި އެ އެއްބަސްވުމުން ދީފައިވާ ލުއިތަކަށްވެސް ބަދަލު އަންނާނެ ކަމަށެވެ. އަދި އެއްބަސްވުމުގެ ދަށުން ނުކޮށް ދޫކޮށްލި ދައުވާތައް އިތުރުކުރުމަށްފަހު އަލުން އެ ދެ މީހުންގެ މައްޗަށް މައްސަލަ ހުށަހެޅުމަށް ފުރުސަތު ދިނުމަށް އެދިފައިވެއެވެ.

އެހެންކަމުން، ގާޒީ ޝަފީއު ވަނީ އެ ދެ މީހުންގެ މައްޗަށް ހުށަހަޅާފައިވާ ދައުވާތަކުގެ ބައި ބާތިލުކުރައްވައި، އަލުން ތަހުގީގު މަރުހަލާ ފުރިހަމަކޮށް އެ ދެ މީހުންގެ ބައި ވަކިން ހުށަހެޅުމަށް ދައުލަތަށް ފުރުސަތު ދެއްވާފައެވެ.

މައްސަލައިގައި އިއުތިރާފުގެ އެއްބަސްވުން ހަދާފައިވާ ފަތޫހުގެ ވަކީލު ބަދަލުވެފައިވާތީ، އިއުތިރާފުގެ އެއްބަސްވުމާމެދު ނިންމާ ގޮތަކާ ގުޅޭގޮތުން ވާހަކަދެއްކުން އެހެން އަޑުއެހުމެއްގައި ކުރިއަށް ގެންދަވަން ގާޒީ ނިންމަވާފައިވެއެވެ. ފަތޫހު އަދި އެއްބަސްވުމުން ރުޖޫއަވެފައެއް ނުވެއެވެ.

މައްސަލައިގައި ދެން ހިމެނޭ ހިޝާމް އާއި ޖިނާހު މިހާތަނަށް ކުށަށް އިއުތިރާފުވެފައެއް ނުވެއެވެ. ނަމަވެސް، ދައުލަތުން މިއަދު ބުނެފައިވާ ގޮތުގައި، އިއުތިރާފުގެ އެއްބަސްވުން ހެދި ތިން މީހުން ވަނީ އެ ކުށުގައި ހިޝާމް އާއި ޖިނާހު ބައިވެރިވި ގޮތް ކިޔައިދީފައެވެ.