ފެނަކަ ކޯޕަރޭޝަނާއި މޫސުމީ ބަދަލުތަކާ، ތިމާވެށި އަދި ހަކަތައާބެހޭ ވުޒާރާ ގުޅިގެން މަގޭ ސޯލާ ޕްރޮގްރާމް ތަޢާރަފްކޮށްފިއެވެ. އޭޑީބީގެ އެހީގައި ހިންގޭ މި ޕްރޮގްރާމްގެ މައިގަނޑު މަޤްސަދަކީ ކަރަންޓު ޚަރަދު ކުޑަކުރުމާއި، ތިމާވެއްޓާ ރައްޓެހި ގޮތުގައި ކަރަންޓު ބޭނުންކުރުމެވެ. އަދި މީގެ އިތުރުން، ރާއްޖޭގައި ލިބެންހުރި އިއާދަކުރަނިވި ހަކަތައިގެ ވަސީލަތްތަކުގެ ބޭނުން އިތުރުކުރުމެވެ.
މި ޚިދުމަތް ފޯރުކޮށްދެވޭނީ ފެނަކައިން ކަރަންޓުގެ ޚިދުމަތްދޭ ހުރިހާ ގޭބީސީތަކަށެވެ. ޚިދުމަތް ހޯދުމަށް އެދެވޭނީ އެކަމަށް ޚާއްސަކުރެވިފައިވާ ޕޯޓަލް މެދުވެރިކޮށެވެ. ޕްރޮގްރާމްގެ ދަށުން 3 ކިލޯވޯޓު އަދި 5 ކިލޯވޯޓުގެ ސިންގަލް ފޭސް އަދި ތްރީ ފޭސް ސިސްޓަމްތައް ދޫކުރެވޭނެއެވެ. އަދި ގޭބީސީތަކަށް ދޫކުރާނެ ސިސްޓަމްގެ ސައިޒް ކަނޑައަޅާނީ ނެޓް މީޓަރިން އުސޫލުގެ ދަށުން ސާވޭ ކުރުމަށްފަހުއެވެ.
3 ކިލޯވޯޓު ސިސްޓަމެއްގެ އަގަކީ 45،000 ރުފިޔާ އަދި 5 ކިލޯވޯޓު ސިސްޓަމެއްގެ އަގަކީ 75،000 ރުފިޔާއެވެ. މި ސިސްޓަމްތަކަށް ފައިސާ ދެއްކުމަށް ދެ ގޮތެއް ހަމަޖެހިފައިވެއެވެ. އެއީ އެއްފަހަރާ ފައިސާ ދައްކައި ޚަލާސްކުރުން ނުވަތަ އިންސްޓޯލްމަންޓް އުސޫލުން 1، 3 ނުވަތަ 5 އަހަރަށް ބަހާލައިގެން ފައިސާ ދެއްކުމެވެ. ސޯލާ ޕީވީ ސިސްޓަމް އިންސްޓޯލްކޮށްދިނުމުގެ މަސައްކަތް ކުރާނީ ފެނަކައިންނެވެ.
