ވޭތުވެދިޔަ ދެ ދުވަހުގެ ތެރޭގައި ޕީއެންސީއަށް 10,400 އާ މެންބަރުން ސޮއިކޮށްފައިވާކަމަށް ވެރިކަން ކުރާ މައި ޕާޓީ، ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި މަޖިލިހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހް މިއަދު ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން، ޕީއެންސީ ރާއްޖޭގެ އެންމެ މެންބަރުން ގިނަ ޕާޓީއަށް ހެދުމުގެ މަސައްކަތް ދަނީ ކުރެވެމުންނެވެ. މި މަސައްކަތުގެ ތެރެއިން ރާއްޖޭގެ އެކި ދާއިރާތަކުން ގިނަ ބަޔަކު ދަނީ ޕާޓީއާ ގުޅެމުންނެވެ. އަދި އަންނަ ނޮވެމްބަރުގެ ނިޔަލަށް ޕާޓީގެ މެންބަރުންގެ އަދަދު 75,000 އަށް އިތުރުކުރުމަށް ރައީސް މުއިއްޒު އަންގަވާފައިވެއެވެ.
އިލެކްޝަންސް ކޮމިޝަނުގެ ދަފްތަރުގައިވާ ގޮތުން މިހާރު އެންމެ މެންބަރުން ގިނަ ޕާޓީއަކީ 50,851 މެންބަރުންނާއެކު އެމްޑީޕީއެވެ. ދެވަނައަށް 34,698 މެންބަރުންނާއެކު ޕީޕީއެމް އަދި ތިންވަނައިގައި 28,983 މެންބަރުންނާއެކު ޕީއެންސީ ހިމެނެއެވެ.
"އެކްސް" ގައި ކުރެއްވި ޕޯސްޓެއްގައި ފަލާހް ވިދާޅުވީ މިދިޔަ ހޮނިހިރު އަދި އާދީއްތަ ދުވަހު ޕީއެންސީއަށް ސޮއިކުރި 10,400 މެންބަރުންގެ އަދަދުން ދައްކުވައިދެނީ ރައީސް ޑރ. މުއިއްޒަށް ރައްޔިތުން ދެއްވާ ތާއީދުގެ ބޮޑުކަމެވެ.
އަދި 2028 ވަނަ އަހަރުގެ ރިޔާސީ އިންތިޚާބުވެސް ކާމިޔާބުކުރައްވާނީ ރައީސް މުއިއްޒު ކަމަށް ފަލާހު ވިދާޅުވިއެވެ. ޕީއެންސީއަށް މެންބަރުން އިތުރުކުރުމުގެ މަސައްކަތް މުޅި ރާއްޖޭގައި ފެށިފައިވަނީ މިއަހަރުގެ އޮގަސްޓު އެއްވަނަ ދުވަހުއެވެ.
