ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، މެރކް ފައުންޑޭޝަން އެފްރިކާ އޭޝިއާ ލޫމިނަރީގެ 11 ވަނަ އަހަރީ ކޮންފަރެންސްގެ ޝަރަފުވެރި މެހުމާނުގެ ގޮތުގައި ޓެންޒެނިޔާގެ ދާރުއްސަލާމަށް ވަޑައިގެންފިއެވެ.
އެކަމަނާއަށް ދާރުއްސަލާމްގެ ޖޫލިޔަސް ނިޔެރޭރޭ ބައިނަލްއަޤުވާމީ ވައިގެބަނދަރުގައި މަރުޙަބާ ދެންނެވީ ޓެންޒޭނިޔާގެ މިނިސްޓަރ އޮފް ކޮމިއުނިޓީ ޑިވެލޮޕްމަންޓް، ޖެންޑަރ، ވިމެން އެންޑް ސްޕެޝަލް ގްރޫޕްސްގެ އޮނަރަބަލް ރިޒީކީ ޖޫމާއެވެ.
މި ދަތުރުފުޅުގެ ތެރޭގައި އެކަމަނާ ފަސްޓް ލޭޑީސްގެ މަތީފަންތީގެ ޕެނަލްގައި ކީނޯޓް ތަޤުރީރެއް ދެއްވުމާއި، މެރކް ފައުންޑޭޝަން ފަސްޓް ލޭޑީސް އިނީޝިއެޓިވް ކޮމިޓީ ބައްދަލުވުމުގައި ވާހަކަފުޅު ދެއްކެވުމަށް ވަނީ ހަމަޖެހިފައެވެ.
މެރކް ފައުންޑޭޝަން އެފްރިކާ އޭޝިއާ ލޫމިނަރީއަކީ ސިއްޙީ ދާއިރާގެ ފަންނީ ތަޖުރިބާކާރުންނާއި، ސިޔާސަތު އެކުލަވާލާ ފަރާތްތަކާއި، ދާރިސުން އެއްތަނަކަށް އެއްވެ، އަންހެނުން ބާރުވެރިކުރުވުމާއި، ބަލިތަކާ ކުރިމަތިލުމާއި، އެފްރިކާ އަދި އޭޝިޔާގައި ފެންވަރު ރަނގަޅު ސިއްޙީ ޚިދުމަތްތައް އާންމުންނަށް ފޯރުކޮށްދިނުމުގެ މަސައްކަތް ކުރިއެރުވުމަށް މަޝްވަރާކުރާ އަހަރީ ބައްދަލުވުމެކެވެ.
