ފަރަގަސްފަރާތުގައި މަސްތުވާތަކެތި ފޮރުވައިގެން އުޅުނު މީހަކު 25 އަހަރަށް ޖަލަށްލުމަށް ކުރި ހުކުމް ހައި ކޯޓުން ދަމަހައްޓައިފިއެވެ.
އެއީ ޅ. ކުރެންދޫ، އަބްހަރުގެ، ހުސައިން ހަލީމްގެ މައްޗަށް ކުރެންދޫ މެޖިސްޓްރޭޓް ކޯޓުން ކޮށްފައިވާ ޑައިމޯފިން ޓްރެފިކް ކުރުމުގެ މައްސަލައެކެވެ.
ހުސައިން ހަލީމް ހައްޔަރުކޮށްފައިވަނީ 2020 ޖޫން 20 ގައި ކުރެންދޫ ފަޅުތެރޭގައި އޮތް މަސްލޯންޗަކުންނެވެ. އޭނާ ނައިފަރު ޕޮލިސް ސްޓޭޝަނަށް ހާޒިރުކުރުމަށްފަހު އިށީނދެ އިން ގޮނޑި ކައިރިން ކަޅު އަދި ރަތް ކުލައިގެ އިންސިއުލޭޝަން ޓޭޕް އޮޅާފައި އޮތް މަސްތުވާތަކެތި ކަމަށް ބެލެވޭ ހަ ރަބަރު ޕެކެޓު ފެނުނެވެ. އޭގެ އިތުރުން އޭނާގެ ފުރަގަސްފަރާތުގައި ފަސް ރަބަރު ޕެކެޓެއް ފޮރުވާފައިވާ ކަމަށް އޭނާ ބުނުމުން ކޯޓު އަމުރެއް ހޯދައި އެކްސްރޭ ނެގިއެވެ.
އެ މައްސަލައާ ގުޅިގެން ދައުލަތުން ހުސައިން ހަލީމުގެ މައްޗަށް ކުރި ދައުވާ ސާބިތުވާތީ، 25 އަހަރަށް ޖަލަށްލުމަށާއި 100,000 ރުފިޔާއިން ޖޫރިމަނާ ކުރުމަށް ކުރެންދޫ މެޖިސްޓްރޭޓް ކޯޓުން ހުކުމްކުރިއެވެ. ނަމަވެސް އެ ހުކުމް ހުސައިން ހަލީމްގެ ފަރާތުން ހައި ކޯޓުގައި އިސްތިއުނާފު ކުރިއެވެ.
މައްސަލަ ބެއްލެވި ހައި ކޯޓުގެ ތިން ފަނޑިޔާރުންގެ ބެންޗުގެ އިއްތިފާގުން ކަނޑައެޅުއްވީ މައްސަލައިގައި ހުސައިން ހަލީމުގެ ހަށިގަނޑު އެކްސްރޭކޮށް ބަލައި ފާސްކުރުމުގައާއި، ހެކި ހޯދުމުގައި ފުލުހުން އަމަލުކޮށްފައިވަނީ ގާނޫނާ އެއްގޮތަށް ކަމަށެވެ.
އަދި އޭނާގެ ފަރާތުން ހުށަހަޅާފައިވާ އިސްތިއުނާފީ ނުކުތާތަކަށް ބަލާއިރު، މެޖިސްޓްރޭޓު ކޯޓުގެ ހުކުމަށް ބަދަލު ގެންނަންޖެހޭ ނުވަތަ ބާތިލުކުރަންޖެހޭ އެއްވެސް ސަބަބެއް ނެތް ކަމަށެވެ.
