ސްޓެލްކޯއިން ސްޓްރެޓީޖިކް އެކްޝަން ޕްލޭން އިފްތިތާޙުކޮށްފިއެވެ. މިއީ 2024 އިން 2028 އަށް އަމާޒުކޮށްގެން އެކުލަވާލާފައިވާ ޕްލޭނެކެވެ. މި ޕްލޭން އިފްތިތާޙުކުރެއްވީ ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީއެވެ.
ފަހުމީ މެނޭޖިންގ ޑިރެކްޓަރުގެ މަޤާމާ ހަވާލުވެވަޑައިގަތުމަށްފަހު، ކަރަންޓާއި، ފެނާއި ނަރުދަމާގެ ސިނާއަތް ރާއްޖޭގެ ތަރައްޤީއާއެކު ކުރިއަރުވައި ތަރައްޤީކުރުމަށް ކުރެވިދާނެ މަސައްކަތްތައް ދެނެގަތުމަށްފަހު އެކުލަވާލެވުނު ޕްލޭނެކެވެ. މި ޕްލޭން އެކުލަވާލުމުގައި އަސާސީ ގޮތެއްގައި ބަލާފައިވަނީ ޚިދުމަތުގެ ފެންވަރު ރަނގަޅުކޮށް، ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމާއެކު، ރައްޔިތުންގެ އިތުބާރު ހޯދުމަށެވެ.
މި ޕްލޭން އެކުލަވާލާފައިވަނީ ކުންފުނީގެ އެކި ދާއިރާތަކުގެ ފަންނީ އަދި ހިންގުމުގެ ދާއިރާގެ މުވައްޒަފުން ހިމެނޭ ޤާބިލު ޓީމަކުންނެވެ. މި ޕްލޭންގައި 5 ސްޓްރެޓީޖިކް އަމާޒާއި، 19 ސްޓްރެޓީޖިކް ލަނޑުދަނޑިއާއި، 55 ޓާގެޓާއި، 96 އެކްޝަން ހިމެނެއެވެ.
ކޮންމެ ޑިޕާޓްމަންޓަކަށްވެސް ވަކި އެކްޝަންތަކަކާއި ޓާގެޓްތަކެއް ކަނޑައެޅި، އެ ޓާގެޓްތައް ހާސިލުވަމުންދާ މިންވަރު ބެލޭނެ ނިޒާމެއް ޤާއިމުކުރެވިފައިވެއެވެ. މިއީ ރައީސް ޑރ. މުޙައްމަދު މުޢިއްޒުގެ ސަރުކާރުން ޔުޓިލިޓީ ޚިދުމަތްތަކުގެ ސިނާއަތަށް ކަނޑައަޅުއްވާފައިވާ ސިޔާސަތުތަކާ އެއްގޮތަށް، ސްޓެލްކޯގެ ސްޓްރެޓީޖިކް ކޮމިޓީގެ ލަފަޔާއެކު އެކުލަވާލައި، ކުންފުނީގެ ބޯޑުގެ ފުރިހަމަ ތާއީދު ލިބިފައިވާ ޕްލޭނެކެވެ.
މި ޕްލޭނުގެ ސަބަބުން ކުންފުނި ހިންގުމަށް ފަސޭހަވެ، ހުރިހާ ދާއިރާތަކަކުންވެސް އެއް އަމާޒަކަށް މަސައްކަތްކުރެވި، ހިންގުން ހަރުދަނާވެ، ކުންފުނީގެ މާލިއްޔަތުން ކުރެވޭ ޚަރަދުތަކަކީ ކަނޑައެޅިފައިވާ ލަނޑުދަނޑިތައް ހާސިލުކުރުމަށް މަގުފަހިވާނެ ޚަރަދުތަކަކަށް ވެގެންދާނެކަމަށް ސްޓެލްކޯގެ އެމްޑީ ފާހަގަކުރެއްވިއެވެ.
