މާލޭ އިންޓަނޭޝަނަލް އެއަރޕޯޓް ހިންގާ އެމްއޭސީއެލްގެ ބޯޑުން އިބްރާހިމް ނޫރައްދީން މިދިޔަ ބުރާސްފަތި ދުވަހު ވަކިކުރުމަށް ނިންމައި، އެކަން ކުންފުނީގެ މުވައްޒަފުންނަށް އަންގައިފިއެވެ. މި ނިންމުން ނިންމީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ކަމުގައިވާއިރު، އަދި އޭނާ ވަކިކުރި ސަބަބެއް ހާމަކޮށްފައެއް ނުވެއެވެ.
ނޫރައްދީން 2019 ގެ މާޗް މަހުން ފެށިގެން އެމްއޭސީއެލްގެ ބޯޑުގައި ހިމެނިވަޑައިގަންނަވައެވެ. އޭނާ ވަކިކުރެއްވުމުގެ ކުރިން، މިދިޔަ ފެބްރުއަރީ މަހު އެމްޔޫ މަނިކު ވަނީ އެމްއޭސީއެލްގެ ބޯޑުން އިސްތިއުފާ ދެއްވާފައެވެ.
ނޫރައްދީންގެ ތަޖުރިބާއަށް ބަލާއިރު، 2005 އިން 2008 އަށް ރައީސް މައުމޫންގެ ވެރިކަމުގައި އެއަރޕޯޓް ކުންފުނީގެ ބޯޑުގައި އިންނެވިއެވެ. އަދި ރައީސް ނަޝީދުގެ ވެރިކަމުގައި 2008 އިން 2010 އަށް އެ ބޯޑުގެ ޗެއަރމަންކަން ވެސް ކުރެއްވިއެވެ.
މީގެއިތުރުން ނޫރައްދީންއަކީ އައްޑޫ އިންޓަނޭޝަނަލް އެއަރޕޯޓް ޕްރައިވެޓް ލިމިޓެޑްގެ ބޯޑު މެންބަރެކެވެ. އަދި މީރުފެންފުށި ރިސޯޓް ހިންގާ ކާސާ ހޯލްޑިންގްސްގެ ފަރާތުން އެ ބޯޑުގައި އިންނަވައެވެ.
އޭނާއަކީ ކްރައުން އެންޑް ޗަމްޕާ ރިސޯޓްސްގެ ޑިރެކްޓަރެއްގެ އިތުރުން، ޓްރީ ޓޮޕް ހޮސްޕިޓަލުގެ ބޯޑު މެންބަރެކެވެ. އަދި މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަޓީ) އާއި މޯލްޑިވްސް އިންފްލައިޓް ކެޓަރިންގެ ބޯޑުގައި ވެސް ހަރަކާތްތެރިވެވަޑައިގަންނަވައެވެ.
