ކުރީގެ ރައީސް ނަޝީދަށް އަމާޒުކޮށް 2021 ވަނަ އަހަރުގެ މެއި މަހުގެ 6 ވަނަ ދުވަހު ދިން ހަމަލާގެ މައްސަލައިގެ މިއަދު އޮތް ޝަރީޢަތުގެ އަޑުއެހުން ކެންސަލް ކޮށްފިއެވެ. މި އަޑުއެހުމަކީ ދައުލަތުގެ ހެކިންގެ ހެކިބަސް ނެގުމަށް ތާވަލުކުރެވިފައިވާ އަޑުއެހުމެކެވެ.
އަޑުއެހުން ފެށުމާއެކު ގާޒީ ސޮފްއަތު ވިދާޅުވި ގޮތުގައި މި މައްސަލައިގެ ދަޢުވާލިބޭ އަލީ ހައިޝަމްގެ ވަކީލު ބަލިވެ އުޅޭތީ އަޑުއެހުމަށް ހާޒިރު ނުވެވޭނެ ކަމަށް ސިޓީއަކުން އަންގާފައިވެއެވެ. އެ ސިޓީގައި ހާޒިރު ނުވެވޭ ސަބަބުތަކުގެ ގޮތުގައި ބަޔާންކޮށްފައިވަނީ، ހައިޝަމްއާ ބައްދަލު ނުވެވުމާއި ފަޔަށް ލިބުނު އަނިޔާއެއްގެ އިތުރުން ބަލިވެ އުޅުމެވެ.
ނަމަވެސް ހައިޝަމްގެ ވަކީލު ހުށަހެޅި މެޑިކަލް ސެޓްފިކެޓަކީ ކޯޓުގެ ބޭނުމަށް ބޭނުންކުރެވޭނެ ލިޔުމެއް ނޫންކަމަށް އޭގައި ބަޔާންކޮށްފައިވާތީ، ވަކީލު ހުށަހެޅި ސަބަބުތައް ގަބޫލުކުރެވެން ނެތްކަމަށް ގާޒީ ވިދާޅުވިއެވެ. މީގެ ކުރިންވެސް މި މައްސަލައިގެ ޝަރީޢަތް ކެންސަލްވެފައިވަނީ އެހެން ދިފާޢީ ވަކީލެއް ހާޒިރުނުވުމުގެ ސަބަބުންކަން ފާހަގަކުރައްވައި، މިގޮތަށް ކޮންމެ ފަހަރަކު ޝަރީޢަތް ކެންސަލްކުރަންޖެހޭނަމަ މައްސަލަ ކުރިއަށް ނުގެންދެވޭނެކަމަށް ގާޒީ ވިދާޅުވިއެވެ.
އެހެންކަމުން، ވަކީލުގެ ސަބަބު ގަބޫލުކުރެވެން ނެތްކަމަށް ނިންމަވައި ޝަރީޢަތް ކުރިއަށް ގެންދަވަން ފެއްޓެވި ނަމަވެސް، ވަކީލަކާ އެކު ނޫނީ ޝަރީޢަތް ކުރިއަށް ގެންދަން ބޭނުންނުވާކަމަށް ހައިޝަމް ބުނުމާއި، އެކަމަށް ދައުލަތުންވެސް އިއުތިރާޒްކުރުމާ ގުޅިގެން މިއަދުގެ އަޑުއެހުން ވަނީ ނިމުމަކަށް ގެނެވިފައެވެ.
