ދައުލަތުގެ މާލީ ތަފާސްހިސާބުތައް ހަތަރު މަހުގެ މެދުކެނޑުމަކަށްފަހު އަލުން ޝާއިއުކުރުމަށް މާލީ ވަޒީރު މޫސާ ޒަމީރު ނިންމަވައިފިއެވެ.
މިކަން އިއުލާނުކުރެއްވީ ސަޕްލިމެންޓަރީ ބަޖެޓު މަޖިލީހަށް ހުށަހެޅުމުގެ ކުރިން ނޫސްވެރިންނަށް މަޢުލޫމާތު ދެއްވުމަށް ބޭއްވި ބައްދަލުވުމުގައެވެ.
ވަޒީރު ވިދާޅުވި ގޮތުގައި، ތަފާސްހިސާބުތައް އާންމުކުރުމާ ގުޅޭގޮތުން އޮޑިޓަރ ޖެނެރަލްގެ ލަފާ ހޯއްދަވާފައިވާ ކަމަށާއި، އެ ލަފަޔާ އެއްގޮތަށް ހިސާބުތައް ތައްޔާރުކޮށް ފޮނުވާފައިވާ ކަމަށެވެ.
އަދި މި އަންގާރަ ދުވަހު 'ވީކްލީ ފިސްކަލް ޑިވެލޮޕްމަންޓްސް' ގެ ނަމުގައި މި ތަފާސްހިސާބުތައް ޝާއިއުކުރައްވާނެ ކަމަށް ވިދާޅުވިއެވެ. އަދި ފަހުން ލިބޭ މަޢުލޫމާތުތަކާއެކު ބަދަލުތަކެއް އަތުވެދާނެކަން ފާހަގަކުރައްވައި، އެކަން ވެސް ހިސާބުތަކުގައި ހިމަނުއްވާނެ ކަމަށް ވަޒީރު ވިދާޅުވިއެވެ.
