ހަގީގަތާ ޚިލާފު މަޢުލޫމާތު ފަތުރާ ކޮންމެ ވެބްސައިޓެއް ބްލޮކްކުރުމަކީ މައްސަލައަށް އޮތް ހައްލެއް ނޫން ކަމަށާއި އޭގެ ސަބަބުން ރާއްޖޭގެ ޕްރެސް ފްރީޑަމް އިންޑެކްސްއަށް ނޭދެވޭ އަސަރެއް ކޮށްފާނެ ކަމަށް މޯލްޑިވްސް މީޑިއާ ކައުންސިލުން ހާމަކޮށްފިއެވެ. މިކަން އެމްއެމްސީން ފާހަގަކުރެއްވީ ރަޖިސްޓްރީ ނުކޮށް ހިންގާ 'ދިޔަވަރު' ނޫހުން ހަގީގަތާ ޚިލާފު މަޢުލޫމާތު ފަތުރަމުންދާތީ، އެކަން ރައްޔިތުންގެ ސަމާލުކަމަށް ގެނައުމަށް ނެރުއްވި ނޫސް ބަޔާނުގައެވެ.
އެމްއެމްސީން ހާމަކުރި ގޮތުގައި މިއަހަރު ތެރޭގައި ކައުންސިލަށް ލިބިފައިވާ 77 ޝަކުވާގެ ތެރެއިން 63 މައްސަލައަކީ 'ދިޔަވަރު' ވެބްސައިޓުގައި ޝާއިޢުކުރެވިފައިވާ ލިޔުންތަކާއި ފޮޓޯތަކާ ގުޅޭ ޝަކުވާތަކެކެވެ. މި ވެބްސައިޓުގައި ޝާއިޢުކުރެވޭ ގިނަ ކޮންޓެންޓްތަކަކީ މީޑިއާ ކައުންސިލްގެ ޤާނޫނާއި ގަވާއިދާއި މީޑިއާތަކުން ޢަމަލުކުރަންޖެހޭ އަޚްލާޤީ މިންގަނޑާ ޚިލާފު ލިޔުންތަކެއްކަން ފާހަގަކޮށްފައިވެއެވެ.
ރަޖިސްޓްރީ ނުކޮށް ހިންގާ ވެބްސައިޓުތަކުން ޤާނޫނާއި ގަވާއިދުތަކާ އަދި އަޚްލާޤީ މިންގަނޑާ ޚިލާފަށް ޚަބަރު ފަތުރާނަމަ، އެ މައްސަލަ ބަލައި ފިޔަވަޅު އެޅުމަކީ މީޑިއާ ކައުންސިލްގެ ޤާނޫނީ ޒިންމާއެއް ނަމަވެސް، މިފަދަ މީޑިއާތަކުގެ މައްސަލަތައް ބެލޭނެ ގޮތެއް ނުވަތަ އެޅޭނެ ފިޔަވަޅުތަކެއް ޤާނޫނާއި ގަވާއިދު އަދި ޝަކުވާ ބެލުމުގެ އުސޫލުގައި ބަޔާންކޮށްފައެއް ނުވެއެވެ.
މިފަދަ ވެބްސައިޓުތައް ބްލޮކްކުރުމަކީ ރާއްޖޭގެ ޕްރެސް ފްރީޑަމް އިންޑެކްސްއަށް ނޭދެވޭ އަސަރެއް ކޮށްފާނެ ކަމެއްކަން ފާހަގަކުރައްވައި، މީޑިއާ ކައުންސިލުން ނިންމަވާފައިވަނީ "މިސްއިންފޮމޭޝަން" އާ ގުޅޭގޮތުން އާންމު ރައްޔިތުން ހޭލުންތެރިކުރުވުމުގެ މަސައްކަތް ކުރިއަށް ގެންދިއުމަށެވެ.
